FBATL sei realiza kampionatu nasionál durante loron neen iha Estádiu Munisípál Dili
DILI, 28 jullu 2023 (TATOLI) – Federasaun Boxe Amadora Timor-Leste (FBATL) hetan ona autorizasaun hosi Ministériu Juventude Desportu Arte no Kultura (MJDAK) atu realiza kampionatu nasionál durante loron neen iha Estádiu Munisípál Dili, hahú 31 jullu to’o 05 agostu.
“Boxe sira husu Jináziu Dili maibé ita la autoriza, tanba kondisaun Jináziu nian rasik sei aat hela, ne’ebé sira husu fali Estádiu Dili ita autoriza ona para sira halo sira nia kampionatu nasionál ne’e”, Diretora Nasionál Patrimóniu Dezenvolvimentu Infraestrutura MJDAK Maria Luisa Monteiro dehan ba Agência TATOLI iha Lecidere, sesta ne’e.
Nia dehan, rin ba Boxe sira hala’o jogu sei tau iha kampu ninin no la autoriza adeptu sira tama ba laran maibé bele tur iha tribun estádiu nian mak asiste jogu.
Iha sorin seluk, Prezidente FBATL Januario Brito hatete, preparasaun ba kampionatu nasionál ne’e atinje ona 80% no buat hotu la’o ho di’ak.
“Ita-nia preparasaun la’o di’ak tebes, agora daudaun atinje ona 80%, kondisaun iha Estádiu Dili di’ak laiha problema ita bele utiliza ba hala’o jogu, iha jogu ne’e mós ami sei fan billete ho folin $1.00 ba ema ida, ami lakoi atu halo karun liu, fan tuir ema nia kbiit atu bele ba asiste jogu ne’e”, Prezidente revela.
Klube no assosiasaun hamutuk 24 mak ba rezistu ona iha FBATL no konfirmadu atu partisipa iha jogu ne’e, hosi númeru ne’e asosiasaun hamutuk ualu no klube hamutuk 16.
Klube no assosiasaun sira ne’e mak El-Matador Club, Dili Leste Boxing, Bairro Pite Boxing Club, Fomento Boxing club, Assosiasaun Aileu, Assosiasaun Bobonaro, Cavalho Boxing club, Assalaino Boxing club, Oriental Boxing, Benfica Boxing, ABM Manatuto, Bidau Masaur Boxing club, Mascarinhas Boxing club, Casa Grande Boxing, Forsa Boxing, Assosiasaun Ainaro, Rumbia Boxing, Sport Laulara Boxing, Loron Matan Boxing, Jovla Boxing, Assosiasaun Kablake, Scorpiong Boxing no Oe-Cusse Lifau Boxing.
Jornalista: Hortencio Sanchez
Editór : Zezito Silva
