g7⁺ aprezenta servisu iha nível nasionál no globál ba SEKOMS
DILI, 31 jullu 2023 (TATOLI) – Organizasaun intergovernamental g7⁺ hasoru malu ho Sekretariu Estadu Komunikasaun Sosial (SEKOMS) Expedito Dias Ximenes hodi aprezenta lalaok servisu g7⁺ nian iha nível nasional no global durante ezistensia.
“g7⁺ mai parabeniza Sekretáriu Estadu Komunikasaun Sosiál no aproveita tempu aprezenta lalaok servisu g7⁺ nian iha nível globál no nasionál, ita mós sei kria akordu servisu hamutuk ida entre SEKOMS ho g7⁺ atu projeta Timor-Leste nia imajen nasaun sira hotu iha mundu”, Sekretáriu Jerál g7⁺ Helder Lopes dehan ba jornalista-sira iha Palásiu Governu, segunda ne’e.
Nia dehan, Timor-Leste hanesan membru plenu ba Komunidade Ko’alia Lian Portugés (CPLP-sigla portugés), fundadór ba g7⁺ no esforsu hela adezaun ba ASEAN ho nune’e parte hotu tenke servisu makas atu bele projeta Timor-Leste nia imajen.
“Ami ko’alia mós ba Sekretáriu Estadu kona-ba iha fulan hira mai oin ita sei iha atividade barak, hanesan reuniaun nível altu hosi Nasaun Unida nian iha Nova Iorque iha setembru, outubru ita sei partisipa iha reuniaun Banku Mundial nian iha Moroco no sei sai observadór prinsipál g7⁺ nian iha Liberia no Kongo iha fulan dezembru, atividade sira ne’e hotu sei involve komunikasaun sosiál hosi Timor-Leste hodi bele projeta naran di’ak ita-nia iha nível internasionál”, nia adianta.
Iha fatin hanesan, SEKOMS Expedito reforsa, servisu hamutuk entre g7⁺ ne’e importante tebes atu fó sai informasaun kona-ba organizasaun ne’e halo iha nível internasionál.
“Ita sei halo kooperasaun ida ho g7⁺ atu servisu hamutuk tanba hahú setembru ba oin iha atividade importante barak presiza atu involve media sira hotu atu bele halo kobertura ba atividade sira”, nia hakotu.
Jornalista: Hortencio Sanchez
Editór : Zezito Silva
