Suku tolu iha postu Baucau vila seidauk finaliza PMOPA
BAUCAU, 31 jullu 2023 (TATOLI) – Suku tolu tolu iha postu admistrativu Baucau vila seidauk finaliza Programa Mão de Obra Postu Admistrativu (PMOPA) faze dahuluk.
Administradór Postu Admistrativu Baucau vila, Insencinio António da Silva, esplika, suku tolu refere mak Bucoli, Gariuai, Samalari tanba durante faze implementasaun hasoru situasaun klima liuliu udan.
“Tanba udan entaun autoridade suku sira dehan hapara lai mak kontiua, liuliu iha Samalari,” Administradór Postu Baucau vila informa ba Agência TATOLI iha Vila Antiga, segunda ne’e.
Insencinio da Silva, argumenta, hafoin lansamentu prosesu implementasaun PMOPA kada suku loron la hanesan, maske iha proposta duransaun loron determina masimu loron-20 maibe suku balun implementa hodi sedu no balun seidauk implementa.
Objetivu hosi programa refere atu rekopera ekonomia komunidade iha baze liuhosi involvementu traballadór informal sira liuliu implementa atividade hanesan limpeza jerál, reparasaun estrada inklui kuda ai-oan.
“Depende ba pedidu hosi kada suku atu hahú implementa bazeia ba kondisaun iha terenu,” Insencinio da Silva akresenta.
Suku ualu seluk hanesan Tirilolo, Triloka, Seisal, Uailili, Buibau, Buruma, Caibada no Bahú finaliza ona no prosesu traballadór sira simu ona direitu tuir durasaun loron ne’ebé atividade refere implementa.
Postu Baucau Vila hetan alokasaun orsamentu hamutuk rihun $100 ne’ebé aloka ba kustu operasionál rihun $5 no kustu aktividade rihun $95 ne’ebé fahé ba suku 11 ho atividade faze rua no envolve traballadór hamutuk 931.
Total orsamentu PMOPA ne’ebé aloka ba munisípiu Baucau tinan-2023 hamutuk rihun $600, kada postu admistrativu rihun hetan alokasaun $100 komposta hosi kustu operasionál pursentu 5 no kustu atividade pursentu 95 no sei involve traballadór informal hamutuk 5.588.
Jornalista : Natalino Belo
Editór : Evaristo Soares Martins
