BAUCAU, 01 agostu 2023 (TATOLI) – Diresaun Transporte Terestre Munisípiu Baucau durante fulan-jullu rekolla reseita hamutuk rihun $ 20.795 ba kofre estadu.
Diretór Serbisu Munisipál Dirasaun Nasional Transporte Terestre Baucau, Roberto da Crus, esplika, reseita refere rekolla liuhosi parte inspesaun, lisensa transporte publiku, karta kondusaun no rejistu.
“Reseita fulan-jullu sa’e kompara ho fulan-juñu iha de’it rihun-10 resin tanba uluk inspesaun ba motorizada no karreta fulan-neen de’it, maibe fulan-jullu orsamentu reseita ba motorizada ho karreta selu tinan-ida tuir orientasaun nasionál nian,” Diretór Serbisu Munisipál Transporte Terestre Baucau hateten iha Vila nova, tersa ne’e.
Hosi reseita refere maihosi totál ema ne’ebé trata dokumentu hamutuk 1.345, komposta hosi trata dokumentus hamutuk 717, inspesaun hamutuk 979, lisensa transporte publiku 139, karta kondusaun 137 no ema ne’ebé rejistu hamutuk 102.
Roberto da Crus, hateten, reseita fulan-jullu sa’e bainhira kompara ho fulan-juñu tanba tuir orientasaun hosi nasionál katak tinan-ida inspesaun ba motorizada sei selu $10 no karreta $40.
Totál funsionáriu ne’ebe serbisu iha DTT Baucau iha hamutuk na’in-haat hodi halo atendimentu ba sidadaun sira-ne’ebe trata dokumentu karreta no motorizada.
Jornalista : Natalino Belo
Editór : Evaristo Soares Martins
