Komandu PNTL pretende reforsa servisu KPK hodi prevene konflitu

DILI, 01 agostu 2023 (TATOLI) – Komandante PNTL Munisípiu Díli Superientendente Xefe Polísia Orlando Gomes, hateten ba mandatu ida ne’e, iha programa prioridade hitu, maibé importante liu mak reforsa servisu Konsellu Polisiamentu Komunitáriu (KPK), envolve komunidade sira atu prevene konflitu iha bairo-laran.
“Durante ha’u nia mandatu ha’u iha programa prioridade hitu. Ha’u nia hakarak reforsa Konsellu Polisiamentu Komunitáriu (KPK). Ne’e halai liubá partisipasauan komunidade nian, tanba partisipasaun komunidade mak sai xave importante ba prevensaun konflitu no garantia situasaun hakmatek iha suku laran. Prevene konflitu iha Díli laran, primeiru mak halo kooperasaun ho komunidade”, Orlando Gomes dehan ba jornalista TATOLI hafoin remata entervista eskluziva iha TATOLI, Farol, tersa ne’e.
Nia dehan, partisipasaun komunidade nian ne’e sai rekursu esterna ne’ebé polísia uza hodi apoiu iha servisu polísia atu garantia situasaun iha suku-laran.
Orlando hateten, mandate ida ne’e mós sei koordena no kolabora ho lider Grupu Arte Marsiál hotu iha Díli atu preve konflitu iha sira-nia hela fatin tanba dala barak problema mosu sempre lori Arte Marsiál.
“Tanba ne’e ha’u bolu ona lider Grupu Arte Marsiál, ita fó fiar ba sira, para sira mak jere no organiza iha sira nia suku ka sira-nia hela fatin para ha’u hakarak situasaun Díli ne’e hakamatek”, nia afirma.
“Ha’u halo ona xamanda ba lider Grupu Arte Marsial liuliu ba bairro ne’ebé sempre mosu konflitu, ha’u fo orientasaun katak ha’u fo fiar ba sira katak ita bo’ot sira ne’e sidadaun timor, nasaun ne’e hamrik mai hosi sofrimentu ema barak hodi nakfilak sai nasaun independénsia. Tanba ne’e ita tenke valoriza ita-nia nasaun. Atu valoriza nasaun, ita bo’ot sira mak tenke kontribui kedan hosi ita bo’ot sira nian hela fatin. Sé problema hato’o ba polísia hodi buka solusaun”, nia adianta.
Nia kompromete katak sei organiza Díli sai di’ak liután liuliu jestaun engarafamentu.
Jornalista: Natalino Costa
Editór : Zezito Silva

