PNTL proibe negosiante ne’ebé okupa trotoár

DILI, 01 agustu 2023 (TATOLI) – Komandu Polísia Nasionál Timor-Leste (PNTL) liuhosi Departamentu Tránzitu Seguransa Rodaviária Nasionál, hahú pasa revista iha Díli atu kontrola no proibe negosiante sira ne’ebé okupa trotoár hodi halo atividade negósiu.
Atividade pasa revista ne’e bazea ba orientasaun hosi Komandu Jerál PNTL ho objetivu atu regulariza orden públiku, atu negosiante sira labele okupa espasu públiku sai fali fatin negósiu liuliu hanesan trotoár no estrada hodi provoka engarafamentu no asidente tráfegu.
Pasa revista liderandu hosi Xefe Departamentu Tránzitu Seguransa Rodaviária Nasionál, Superintendente Asistente Polísia Luis da Costa, atividade hahú kedas hosi loron domingu (30/7) no kontinua horseik (31/7) ba área sira hanesan Fatuhada, Elemloi Delta, Bairu Pite inklui fatin sira seluk ne’ebé durante ne’e negosiante sira uza ba atividade negósiu hodi perturba movimentasaun transporte públika.
“Operasaun ida ne’e tanba orientasaun mai kedan hosi Komandante Jerál ho Segundu hodi hatún ba Komandante Operasaun Nasionál katak Tránzitu Nasionál tenke servisu hamutuk ho Tránzitu Komandu Munisípiu Díli atu bele neutraliza no normaliza transporte sira hosi engarafamentu iha Díi laran”, Komandante PNTL Munisípiu Díli Superintendente Xefe Polísia Orlando Gomes ba jornalista TATOLI, Farol, tersa ne’e.
Nia dehan, operasaun ida ne’e PNTL sei kontinua nafatin atu bele regulariza komunidade sira liuliu negosiante sira labele okupa fali espasu públiku liuliu trotoár no estrada sai fali fatin negósiu.
Tanba trotoár ne’e, ema atu la’o ain no estrada ne’e ba movimentu transporte públiku, kuandu sidadaun okupa fali espasu sira ne’e ba halo atividade negósiu ne’e labele.
“Operasaun ne’e sei halo diariamente no rutinaria tantu loron ka kalan liuliu ita sei intensifika iha tempu kalan tanba loraik ne’e ita haree ema uza trotoár hodi faan no provoka engarafamentu ida ne’e mak ita sei haree hodi normaliza”, nia afirma.
Iha sorin seluk, Xefe Departementu Tránzitu Seguransa Rodaviariu Nasionál, Superintendente Asistente Polísia Luis da Costa, hateten Polísia Nasionál Timor-Leste (PNTL) liuhosi Polísia Tranzitu Seguransa Rodaviária observa fatin ualu ne’ebé sempre halo engrafamentu iha kapitál.
“Ohin halo ona normalizasaun ba fatin sira ne’e no avizu ba negosiante no motorista sira husi terminál Bekora to’o Tasi-Tolu”, nia dehan.
Bazea ba lei tránzitu númeru 6/2003 artigu 93 koalia kona-ba fatin trotoár so utiliza ba ema la’o ain, ida ne’e mak obrigasaun PNTL aviza ba negosiante.
“Faan sasan no para kareta motór tuir ida-idak nia fatin labele uza trotoár hodi halo negósiu no para kareta motór tanba ema lao ain mós iha direitu atu uza fatin ne’e. Ami servisu hamutuk ho Polísia Tránzitu Munisípiu Díli hodi fó aviza hahú aban ba oin negosiante no motorista labele uza ona trotoár hodi faan sasan no para kareta no motór. Sé sira la koopera mak parte jestaun merkadu sei foti asaun rigór”, Luis afirma.
Jornalista: Natalino Costa
Editór : Zezito Silva

