Setembru : FDETL realiza kompetisaun pra-liga PUBG no Mobile Legends
DILI, 01 agostu 2023 (TATOLI) – Sekretáriu Jerál Federasaun Desportu Elétrika Timor-Leste (FDETL) Josue Turquel, dehan iha fulan setembru nia-laran sei realiza kompetisaun pra-liga ba desportu elétrika ne’ebé sei hala’o iha Jináziu Dili.
“Tinan ikus ida ne’e la sala iha setembru ami sei iha pra-liga, iha pra-liga ne’e ami foku liubá Game rua PUBG no Mobile Legends, tanba iha Timor-Leste iha Game rua ne’e maka ema gosta halima”, Josue dehan ba Agência TATOLI iha Colmera Dili, tersa ne’e.
Federasaun ne’e rejistu ona iha notariadu hanesan federasaun desportiva ida iha Timor-Leste ne’ebé kompostu hosi assosiasaun rua mak PUBG no Mobile Legends.
“Liuhosi kompetisaun ida ne’e ami planu atu identifika ekipa sira ba primeiru divizaun no segunda divizaun, atu ne’e tinan sira mai oin ita bele iha ona atividade jogu ba primeiru divizaun no segundu divizaun nian, ekipa ne’ebé mak halimar di’ak nia mantein iha divizaun ida no halimar la di’ak bele tun ba divizaun segundu”, nia dehan.
Tuir dadus ne’ebé FDETL, iha klube hosi asosiasaun rua ne’e mak PUBG nia klube hamutuk 130 no Mobile Legends hamutuk 50, kada klube ida akomula jogadór hamutuk 15.
FDETL daudaun ne’e mós sai ona hanesan membru ba organizasaun International Sport Federation (ISF).
FDETL nia objetivu loloos mak foku ba dezenvolve, kria no harii komunidade gamer sira ne’ebé foku ba desportu eletróniku.
“Desportu eletróniku ne’e mak desportu hirak ne’ebé ita hala’o ne’ebé la’os fíziku maibé liuhosi telemovél, komputadór no seluk tan”, nia relata.
Desportu ne’e konsege halibur ona joven sira, hahú tinan 2017 to’o ohin loron no hetan nia legalidade hanesan federasaun iha janeiru 2023 liubá.
FDETL iha patrosinadór permanente ho Telkomcel no All Long Cafe ho nune’e eventu ne’ebé atu hala’o sei hetan apoiu finansiamentu hosi patrisinadór ne’ebé mensiona.
Tuir estimasaun ne’ebé FDETL iha durante atividade pra-liga sei gasta osan hamutuk rihun $30 to’o rihun $40, orsamentu hirak ne’e sai hanesan prémiu ba manán na’in sira, kobre ba Live Streaming, ekipamentu dijitál, tékniku produsaun video no seluk tan.
Maske foin eziste maibé FDETL iha tinan kotuk hetan kovite hodi partisipa iha SEA Games Kamboja maske la liuhosi Governu maibé ba individu.
Rezultadu SEA Games seidauk hatudu progresu ruma maibé feredarasaun ne’e sei hadia aan liután atu ba kompete mós iha eventu internasionál sira.
Jornalista: Hortencio Sanchez
Editór : Zezito Silva
