Vise MS enkoraza servisu ospitalár
DILI, 01 agostu 2023 (TATOLI) – Vise-Ministru ba Operasionalizasaun Ospitál Flávio Brandão Mendes de Araújo realiza enkontru ho konsellu Diresaun ezekutivu Hospital Nasionál Guido Valadares (HNGV) atu fó apoiu morál hodi ba oin servisu di’ak liután no bele hetan nafatin konfiansa hosi sidadaun hotu.
“Ita tenke konsiente ba problema sira ne’ebé maka akontese no sai lamentasaun públika, ne’e problema ida ne’ebé mak HNGV rasik hatene solusiona, ha’u fiar katak dirasaun ezekutivu komprometidu atu haree oinsa mak fó asisténsia ida ne’ebé mak di’ak liubá ospitalidade ne’ebé mak médiku no enfermeiru no parteira sira sei halo prestasaun ida ne’ebé maka atu bele hetan konfiansa no restaura fila fali konfiansa povu nian ba HNGV, ida ne’e mak ami-nia objetivu ohin oinsa atu ba oin sai di’ak liután”, Vise Ministru Saúde, Flávio Brandão dehan ba jornalista sira iha HNGV Dili, tersa ne’e.
Governu komprometidu atu fazeadamente redúz transferénsia ba rai liur hafoin pasiente sira hetan tratamentu.
“Ita refere ba kazu sira ne’ebé mak hetan númeru boot haruka ba rai liur, hanesan káncru, tumor, fuan, ne’ebé mak durante ne’e ita haruka ba rai liur, agora ba oin ita sei kontinua haruka maibé ita fazeadamente hasa’e nia kapasidade halo diagnóstika rai laran tuir fali mai hasa’e kapasidade hal intervensaun iha rai laran entaun servisu iha faze rua ne’e ita sei la’o atu sedu ou tarde ita sei la haruka pasiente ba rai liur”, nia revela.
“Antes ne’e Timor-Leste sempre haruka pasiente ba rai-liur hodi fase raan, iha ezersísiu extra ida ne’ebé mak konsellu halo iha tinan rua liubá kotuk tempu Covid-19 nian, pasiente ida mós la haruka ba rai-liur ita konsege haruka fila fali pasiente sira ne’ebé mak ba fase raan iha rai-liur mai fali fase iha rai-laran, ne’e modelu ida ne’ebé mak ita konsege no sussesu iha tempu ne’ebá no ba oin ita ita halo ba buat rua ida mak kánkru no fuan, ita sei konsege halo tan moras rua ne’e iha tempu badak ne’e mak ita nia alvu prinsipál atu pasiente labele ba rai-liur”, nia haklaken.
Jornalista: Hortencio Sanchez
Editór : Zezito Silva
