Estudante 413 sai benefisiáriu bolsa méritu faze dahuluk iha Baucau
BAUCAU, 02 Agustus 2023 (TATOLI) – Estudante hamutuk na’in-413 hosi munisípiu Baucau sai benefisiáriu faze dahuluk bolsa méritu.
Diretór Serbisu Munisipál Edukasaun Baucau, Augosto Ornai Ximenes, esplika, tuir informasaun Banku Nasionál Komersiu Timor-Leste (BNCTL, sigla portugés) transfere ona ba kada benefisiáriu sira-nia konta bankária inklui munisípiu Baucau hamutuk na’in-413 refere.
“Entre benefisiáriu, munisípiu Baucau ne’ebé hatama uluk dokumentu ba faze dahuluk hamutuk na’in-413,” Diretór Serbisu Munisipál Edukasaun hateten iha Vila nova, kuarta ne’e.
Maske nune’e Serbisu Munisipál Edukasaun Baucau sei hein informasaun formal hosi Diresaun Nasionál Ensinu Ministériu Edukasaun nune’e bele konfere lista benefisiáriu sira hodi informa direita ba kada estudante liuhosi eskola.
Augosto Ximenes, aplea ba benefisiáriu sira-ne’ebé hela besik iha Baucau Vila bele direitamente ba banku hodi konfirma kona-bá orsamentu ba bolsa méritu faze dahuluk nian.
Munisípiu Baucau hamutuk benefisiáriu 1.308 mak submete ona dokumentu hosi totál 1.495, fahe ba faze datoluk hanesan faze dahuluk na’in-413, daruak na’in-492 no faze ikus na’in-403.
Enkuantu benefisiáriu na’in-187 mak hasoru difikuldade hanesan inan-aman balun laiha vontade atu trata dokumentu no inan-aman mate hela ho família inklui estudante balun devorsiadu.
“Ministériu oreinta ona atu benefisiáriu hotu iha direitu hetan bolsa méritu mesmu seidauk kompletu, ami hein konforme ba orden kona-ba meiu atu uza,” Augosto Ximenes akresenta.
BNCTL rasik transfere ona orsamentu hamutuk millaun $3 ba benefisiáriu hamutuk 5.407 iha loron-31 jullu hosi totál orsamentu hosi Ministériu Edukasaun hamutuk milaun $7.2 ne’ebé sei transfere ba estudante hamutuk rihun hitu resin iha faze dahuluk.
Tuir dadus hosi Ministériu Edukasaun totál benefisiáriu ba bolsa méritu hamutuk 12.927.
Jornalista : Natalino Belo
Editór : Evaristo Soares Martins
