MAI Sport Zone Gym kontribui ba hadia saúde
DILI, 02 agostu 2023 (TATOLI) – Jerente MAI Sport Zone Gym Anastacio da Costa, dehan ezisténsia Gym ne’e atu kontribui ba hasa’e talentu juventude sira-nian no hadia saúde ema nian liuhosi jinástika hiit bessi.
“Objetivu hosi ezisténsia Sport Zone Gym nian atu kontribui ba talentu joven sira-nian no hadia saúde ema nian atu bele moris ho saudável, ida ne’e ba ema hotu la’os joven de’it maibé ema hotu”, Jerente dehan ba Agência TATOLI iha Farol Dili, kuarta ne’e.
MAI Zone Gym la’os fatin ba hiit bessi de’it maibé iha mós fatin hanesan Jináziu, kampu futeból futsal, basketból, kik Boxing MMA, badminton iha mós Biliard bainhira ema ba tuir treinamentu hiit besi bele ba prátika desportu hirak ne’ebé iha.
“Ita loke Jináziu ne’e selu taxa ba Governu, entaun ami nia kritéria iha ne’ebá maluk sira hakarak sai membru ba ami-nia fatin tenke mai rejistu uluk lori ho billete identidade no ema estranjeiru lori ho pasaporte atu selu bele halao ona atividade iha laran, kada fulan selu $50 maibé bele asesu ba buat hotu iha laran”, nia haklaken.
Iha fatin ne’e, kontribui ona ba hamenus dezempregu iha nasaun ne’e tanba fó ona servisu ba ema timoroan hamutuk 14, maske oituan maibé kontribui ba dezenvolvimentu nasaun nian liuhosi selu tasa ba Estadu.
Tanba ne’e, nia husu ba timoroan hotu ne’ebé iha interese atu hadia saúde liuhosi Gym bele hakat ba MAI Zone Sport Gym iha Hudilaran Dili.
MAI Zone Sport Gym rejista membru permanente ne’ebé kada loron sempre ba hala’o atividade hiit bessi no seluk tan hamutuk ema na’in 200-resin.
Jornalista: Hortencio Sanchez
Editór : Zezito Silva
