DILI, 02 agostu 2023 (TATOLI) – Departartementu Tránzitu Seguransa Rodoviária Nasionál hamutuk ho Tránzitu Munisípiu Díli halo pasa revista ba mikrolete ne’ebé uza reben metan.
Atividade pasa revista ne’e hala’o iha Palásiu Governu iha kuarta (02/8) ne’e ho objetivu atu kontrola transporte públiku hanesan mikrolete ne’ebé uza reben metin ho metan la autoriza hodi halo sirkulasaun.
“Ita-nia atividade pasa revista iha ba mikrolete ne’e sira atu kontrola kualker mikrolete labele reben metin, kuandu reben mak sirkula mak tránzitu haree, sei halo apreensaun no aplika multa”, Komandante Polísia Nasionál Timor-Leste (PNTL) Munisípiu Díli Superintendente Xefe Polísia, Orlando Gomes, hateten ba jornalista sira iha Komandu PNTL, kuarta ne’e.
Nia dehan, atividade pasa revista ne’e sei kontinua la’o no sei la para, tanba ne’e husu motorista sira liuliu kondutór mikrolete sira ne’ebé halo sirkulasaun iha Díli, tenke kumpre hodi labele reben metan karreta.
“Ha’u husu ba kondutór mikrolete sira ne’ebé halo sirkulasaun iha Díli tenke kumpre regra labele reben metan imi-nia karreta. Kuandu reben metan ami sei halo apreensaun”, Gomes hateten.
Tuir observasaun jornalista TATOLI iha terenu, PNTL Departementu Trázitu Nasionál, Tránzitu Munisípiu hapara mirkolete 10-resin iha Palásiu Governu nia oin hodi hasai atributu sira ne’ebé reben iha mikrolete no halo mós pasa revista ba mikrolete sira ne’e nia dokumentu komprovativu sira.
Jornalista: Natalino Costa
Editór : Zezito Silva
