Tribunál aplika Prizaun Preventiva ba arguidu envolve kazu omisídiu Elemloi

DILI, 03 agostu 2023 (TATOLI) – Tribunál Judisiál Primeira Instánsia Díli (TJPID) aplika medida koasaun Prizaun Preventiva ba arguidu ho inisiál HSM ne’ebé suspeita envolve kazu omisídiu hodi halakon Isac Sinarai da Costa nia vida iha área Elemloi, Delta III, Suku Comoro, Postu Administrativo Dom Aleixo, Munispiu Díli.
Hafoin Tribunál haree tiha ba faktu sira, lihosi despaixu ikus Juiz ne’ebé prezide interogatóriu dahuluk, Juiz Afonso Carmona deside aplika Prizaun Preventiva ba arguidu HSM tanba perante iha prosesu interogatóriu iha indísiu forte katak arguidu HSM envolve duni kazu omisídiu hodi halakon matebian Izac Sinarai da Costa nia vida iha area Elemloi.
“Tribunál Aplika medida Prizaun Preventiva ba arguidu tanba indísiu forte ba arguidu envolve duni kazu omisídiu ne’e”, Prokuradór Luis Hernani Rangél hateten ba jornalissta iha Tribunál Judisiál Primeira Intánsia Díli, Colmera, kinta ne’e.
Iha prosesu interogatóriu dahuluk Prokuradór Luis Hernani Rangél akuza arguidu ho krime omisídiu simples ne’ebé previstu iha artigu 138 hosi kódigu penál Timor-Leste.
Durante prosesu interogatóriu dahuluk ba arguidu HSM akomapaña hosi nia fen oan no família sira seluk.
Jornalista: Natalino Costa
Editór : Zezito Silva

