Tribunál hasai ona sitasaun ba PNTL hatan keixa Ela Variana

DILI, 03 agostu 2023 (TATOLI) – Defeza hosi Ela Variana, Sergio Quintas, hateten Tribunál Judisiál Primeira Instánsia Díli, hasai ona mandadu judisiáriu hodi fó sitasaun ba Polísia Nasional Timor-Leste (PNTL) atu halo kontestasaun ba keixa ne’ebé mak Ela Variana hato’o ba Tribunál relasiona ho atuasaun PNTL nian hasoru nia.
“Horseik Tribunál hasai ona mandadu judisiál hodi halo sitasaun ba parte PNTL atu kontesta keixa ne’ebé mak Ela Variana aprezenta ba Tribunál foin daudaun ne’e”, Sergio Quintas hateten ba jornalista sira iha Tribunál Judisiál Primeira Instánsia Díli, Comera, kinta ne’e.
Situasaun ne’ebé mak Tribunál Judisiál Primeira Intansia Díli halo ne’e, bazea ba artigu 359 númeru 2, ne’e tenke hasai sitasaun hodi sita parte PNTL atu halo kontestaun ba petisaun ka keixa ne’ebé mak parte autór aprezenta ona ba Tribunál iha loron 30 nia-laran.
“Sira (PNTL) iha obrigasaun tenke hato’o sira-nia kontestasaun iha prazu loron 30-nia-laran. Sé karik sira la kontesta ne’e sira-nia direitu”, nia adianta.
Sergio Quintas esplika, kuandu parte PNTL la kontesta tuir prazu ne’ebé Tribunál fó ba sira iha loron 30 nia-laran. Entaun Tribunál iha obrigasaun konsidera PNTL konfensa ona faktu.
“Kuandu iha loron 30 nia-laran mak sira la aprezenta kontestasaun entaun PNTL konfesa ona faktu signifika rekoñese faktu sira ne’ebé mak artipula iha keixa Ela Variana ne’ebé aprezenta ba Tribunál foin dadaun ne’e loos hotu”, nia salieneta.
“Maibé ita hein de’it iha loron 30 nia-laran ne’e sira aprezenta kontestasaun ka lae”, nia hatutan.
Tuir norma prosesuál, la’o hanesan ne’e kuandu Tribunál hasai sitasaun mak nia la kumpre hodi halo kontesaun maibé laiha entaun iha nia konsekuénsia.
Rekorda katak Ela Variana akompaña hosi nia Defensór Públiku Sergio Quintas, iha kinta (27/7) hatama keixa ba Tribunál Judisiál Primeira Instánsia Díli.
Jornalista: Natalino Costa
Editór : Zezito Silva

