Abertura Liga Futsal, AD Samoro halo terus ASS Jerman ho rezultadu 4-1
DILI, 04 agostu 2023 (TATOLI) – Liga Futsal Timor-Leste ne’ebé abertura ona iha kampu futsal Falintil Forsa Defeza Timor-Leste (F-FDTL) fatuhada Dili sesta loraik ne’e hasoru malu entre ekipa primeira divizaun rua, AD Samoro konsege halo terus nia adversáriu ASS Jerman ho eskoru 4-1.
Bainhira jogu hahú ekipa rua lansa kedan kontra no atake ba malu tuir tékniku no abilidade ekipa ida idak nian atu hatama golu.
Hosi kontra no atake ne’e Samoro hatudu kedan nia jogu brillante iha menutu haat jogadór Aristides Pires lansa ona golu primeiru hodi muda rezultadu ba 1-0.
Hosi golu ne’e hasa’e liután velosidade jogu entre ekipa rua ne’ebé ho ambisaun makas atu hatama golu no aumenta golu nune’e fó vitória ba ekipa atu bele save metin pontu tolu.
Ho ambisaun ne’ebé Jerman iha la hela de’it hanesan ambisaun tanba iha menutu 12 jogadór Rafael de Carvalho lansa responde ona golu ida ba Samoro hodi muda rezultadu ba 1-1.
Hosi jogu ne’e mós halo naruk tebes ekipa rua nia esforsu iha kampu laran maske kosar haris bokon hosi ain to ulun, iha kampu ninin hafutar ho adeptu ne’ebé hamrik halae kampu ninin hodi hakilar ho lian makas fó suporta ba ekipa rua ne’e.
Kampu be pinta mean kahur ho azul ne’e fó sasin duni ba ekipa rua nia jogu hodi haktuit lolos vitória ba Samoro tanba rekoñese Samoro nia jogu extraordináriu tebes tanba iha menutu 27 jogadór Jovano Braz halo golu ida muda rezultadu ba 2-1.
Hosi holu ne’e halo rame liután jogu maibé forsa ba Samoro makas ba bebeik nune’e iha menutu 29 jogadór Bernardo Vong fira tan rede Jerman nian lori rezultadu nakfilak ba 3-1.
Vitoria Samoro nian besik sai ona realidade basa rezultadu iaa ekran hatudu momos no lolos katak Samoro mak lidera provijoriu maske jogu sei la’o, nune’e iha menutu 31 jogadór Aristides Pires kompleta golu ikus hatur rezultadu metin ba 4-1.
Hosi rezultadu ne’e Samoro mak iha direitu absoluta ba gaña pontu tolu enkuantu Jerman tenke hela ho derrota hodi hein fali jogu tuir mai.
Jornalista: Hortencio Sanchez
Editór : Zezito Silva
