Top

FM husu MJ halo avaliasaun servisu PCIC

Imajen google

DILI, 04 agostu 2023 (TATOLI) – Diretór Fundasaun Mahein (FM) Nelson Belo, husu ba Ministru Justisa Amandio de Sá Benevides atu halo avaliasaun ba servisu Polísia Sientífika Investigasaun Kriminál (PCIC,sigla portugés), atu bele dezempeña servisu PCIC.

Nia dehan, dalaruma públiku kestiona servisu PCIC nian iha aspeitu atuasaun sira iha terenu, tanba ne’e mak Ministru Justisa iha mandatu IX Governu Konstituisionál halo avalizasaun ba servisu PCIC atu bele hatene atinjimentu no susesu saida mak PCIC presta ona durante ne’e.

“Rekomendasaun hosi Funsaun Mahein nia mak ne’e, tenke halo avaliasaun di’ak atu bele hatene PCIC ne’e sei util ka la’e ka presiza restrutura”, Nelson Belo ba TATOLi iha kna’ar fatin Lecidere, sesta ne’e.

Tuir Belo, Primeiru Ministru, Xanana Gusmão iha nia deklasaun fó fulan neen ba Ministru Justisa atu avalia servisu PCIC nian, molok submete fali rezultadu avaliasaun ba Xefe Governu, atu Governu bele deside restrutura PCIC hodi integra fali ba PNTL bazea ba programa Governu ka halo de’it restruturasaun intenál hodi mantein PCIC tutela nafatin ba Ministériu Justisa.

“Laos tanba Portugal iha ona Polísia Judisiária ne’ebé ita mós kria instituisaun PCIC maibé ita tenke haree ninia efikasia no efisiénsia, ita tenke kria instituisaun ida ne’ebé mak bazea ba ita nian nesesidade”, nia adianta.

Nia husu ba Governu atu kria polítika ida ne’ebé mak bele guia instituisaun Estadu.

“Hanesan iha asuntu seguransa nian, Governu tenke kria polítika definitiva ida ne’ebé hanaran seguransa nasioanál tanba ida ne’e to’o agora ita seidauk iha. Kuandu ida ne’e ona, entaun  Governu ne’ebé tuir mai bele utiliza de’it konseitu ida ne’e hodi dezenvolve di’ak liután instituisaun seguransa”, Belo afirma.

“Maibé tanba ita-nia polítika seguransa nasionál seidauk iha, entaun sé de’it mak hakarak sa’e Primeiru-Ministru no Ministru Interiór bele halo mudansa bainhira de’it tanba laiha polítika ne’ebé atu guia ita-nia seguransa nasionál”, nia konklui.

Jornalista: Natalino Costa  

Editór : Zezito Silva

Publisidade

Leave a Reply

Latest Post

error: Content is protected !!