Ohin abertura ba Liga Futsal Timor-Leste
DILI, 04 agostu 2023 (TATOLI) – Adjuntu Sekretáriu Jerál Federasaun Futeból Timor-Leste (FFTL) Frederico Martins, hatete ohin, tuku 16:300, iha kampu futsal, Kuartel Jeneral Falintil Forsa Defeza Timor-Leste (F-FDTL) Fatuhada, Assosiasaun Futsal Timor-Leste (AFTL) sei hala’o abertura ba Liga Futsal Timor-Leste.
“Ohin ita sei hala’o abertura ba Liga Futsal Timor-Leste ne’ebé sei hala’o iha kampu futsal F-FDTL nian iha Fatuhada, jogu ne’e ita hetan apoiu másimu hosi patrosinadór hosi Oka Laran di’ak no FFTL rasik”, Frederico dehan ba Agência TATOLI, iha edifísiu FFTL Dili, sesta ne’e.
Liga futsal ne’e sei fahe ba primeira divizaun no segunda divizaun ho durasaun jogu fulan tolu resin, hahú agostu no termina iha outubru tinan ida ne’e.
Oráriu jogu primeiru divizaun sei hala’o kuarta, kinta kada loron, segunda divizaun sei hala’o sesta-domingu kada loron to’o remata.
Primeiru Divizaun kompostu hosi klube 10 no segundu divizaun kompostu hosi klube 12.
Klube primeru divizaun mak Ramelau Fc, Mushila Fc, Mauputar Fc, Caesar Dante Fc, Boa Sorte Fc, Because United Fc, Sao Francisco Xavier, AD Samoro, Gamer Fc, Jarman Fc.
Klube segunda divizaun mak hanesan Fc Coelho, Santa Cruz Fc, Maudoko Fc, Boavista Fc, Bermeta Fc, Estrela Baguia, Fitun Estudiante, Crazy hose, Baucau All Star, B’tal Fc, Kablaki Fc, Academica Fc.
Orsamentu ne’ebé apoiu ba liga ne’e FFTL apoiu rihun-$40 no Oka laran di’ak apoiu rihun-$20.
Jornalista: Hortencio Sanchez
Editór : Zezito Silva
