Selesaun nasionál U-23 prepara kompete iha kompetisaun AFF
DILI, 04 agostu 2023 (TATOLI) – Adjuntu Sekretáriu Jerál Federasaun Futeból Timor-Leste (FFTL) Frederico Martins, informa selesaun nasionál Under 23 (U-23) preparadu ona atu ba kompete iha eventu internasionál ASEAN Football Federation (AFF) ne’ebé sei hala’o iha nasaun Thailandia 20 agostu agora.
“Agora ita iha preparasaun ba kompetisaun U-23 nian ne’ebé sei ba joga iha kompetisaun AFF nian ne’ebé sei hala’o iha Thailandia fulan ida ne’e, sira agora halo hela tratamentu másimu tebes fiar katak iha jogu ita sei halo netik buat ruma”, Frederico dehan ba Agência TATOLI iha edifísiu FFTL Dili, sesta ne’e.
Nia dehan, FFTL esforsu hela oinsa selesaun bele aranka sai hosi Timor-Leste ba Thailandia iha tempu besik atu hala’o treinamentu iha Thailandia no halo jogu amigável mínimu tolu antes tama ba kompetisaun hodi koko Timor-Leste nia forsa.
Jogadór ne’ebé FFTL prepara hamutuk 26 maibé tempu besik sei halo mós selesaun ba jogadór ikus liu atu hili de’it jogadór hamutuk na’in 23 mak sei ba joga iha kompetisaun ne’e.
Iha jogu ne’e, Timor-Leste tama iha grupu B sei joga kontra Indonézia no Malázia.
Ekipa ne’ebé Timor-Leste sei hasoru todan maibé ho preparasaun ne’ebé iha Timor-Leste nafatin otimista sei hatudu jogu brillante lakon ho dignidade manán mós ho dignidade.
Jornalista: Hortencio Sanchez
Editór : Zezito Silva
