Empata 3-3, Cesar Dante ho Mushila fahe pontu ba malu
DILI, 05 agostu 2023 (TATOLI) – Ekipa jigante kapitál Dili Caesar Dante Fc no Gamer Fc obrigadu tenke fahe pontu ba malu tanba rezultadu jogu termina ho eskoru 3-3 iha jogu Liga Futsal Timor-Leste ne’ebé hala’o iha kamlo Falintil-Forsa Defeza Timor-Leste (F-FDTL) Fatuhada Dili, sabadu kalan.
Hanesan baibain jogu hahú ekipa rua preparadu antes hodi hatudu jogu ne’ebé brillante atu nune’e bele save pontu tilu hodi hakat ba oin.
Bainhira jogadór sira la’o tama ba kampo futsal ne’ebé nahe aan ho kor azul no mutin nia laran halo adetus sira antuziasmu tebes hodi basa-liman no hakilar fó apoiu makaas ba jogadór sira atu bele joga ho esperansa no fiar aan.
Bainhira árbitru hú árbitu, jogu komesa jogadór sira lansa kedan kontra no atake ba malu tuir tékniku no abilidade ne’ebé iha hodi buka hatama golu liu hosi fintas ba mai no halo sutu oioin.
Hosi kontra no atake ne’e ekipa Mushila domina bola jogadór João Paulo lansa kedan golu primeiru hodi hatur rezultadu ba 1-0.
Jogu komesa manas liutan bainhira golu ne’e akontese, Caesar Dante la nonok de’it buka meiu hotu atu responde golu ba Mushila maibé jogadór Mushila halo auto-defeza ne’ebé makaas no seidauk bele rezulta golu ruma.
Jogu la’o too minutu 18 jogadór Denato Amaral konsege sobu defeza Mushila hodi responde golu ida muda rezultadu ba 1-1, golu ne’e provoka liu tan adetu sira atu hakilar makaas liu tan halo kampo ne’e atu rahun tiha de’it.
Maibé iha fali minutu 33 jogadór Mushila sira hadau fila fali oportunidade liuhosi jogadór Joaninho Fatima les golu ida hodi muda rezultadu Mushila nian ba 2-1.
Hosi golu ne’e provoka tebes emosaun Caesar Dante nian ho nune’e jogadór sira halo esforsu másimu tebes iha menutu 34 jogadór Gelvanio Marçal responde ona golu ida hatuur rezultadu empata 2-2.
Liu de’it minutu ida jogadór Gelvanio nafatin hatudu jogu bonitu lansa tan golu ikus hodi hatuur rezultadu ba 3-2, hosi rezultadu ne’e Caesar Dante laran metin ona atu manán maibé Mushila nunka rende no la fó valda ba Caesar Dante atu manán saugati de’it.
Dignidade klube jigante kapitál Dili Mushila nian la monu le’et duni tanba sei hetan salvasaun hosi jogadór Zaquel Pinto iha minutu 39 hatama golu ikus hodi hasai Mushila hosi lakon.
Hosi rezultadu ne’e fó biban ba ekipa rua hodi fahe pontu ida ida ba malu hodi hein fali jogu sira tuirmai.
Jornalista: Hortencio Sanchez
Editór: Evaristo Soares Martins
