DILI, 05 agostu 2023 (TATOLI) – Ekipa primeira divizaun Liga Futsal Timor-Leste São Francisco Xavier Fc susesu iha nia jornada primeiru hodi fó supreza ba nia adversariu Gamer Fc ne’ebé hafalun ho tristeza tanba rezultadu ikus termina ho eskoru 7-4.
Jogu ba ekipa rua hala’o iha kampo futsal Falentil-Forsa Defeza Timor-Leste (F-DTL) Fatuhada Dili, sabadu loriak ne’ebé hafutar ho adetus ne’ebé hamrik taka tomak rede kampo nian hodi fó suporta masimu ba ekipa idaidak.
Ho nune’e jogu la’o ekipa rua lansa kedan kontra no atake ba malu tuir tekniku no abiliade ne’ebé sira simu hosi treinadór rua hosi ekipa rua.
Kontra no atake ekipa rua ne’e la hela de’it hanesan kontra no atake tanba menutu primeiru nia laran ekipa Gamer domina liu bola hodo halo presaun makas ba ekipa adversariu ho nune’e iha menutu lima jogadór Alexandre da Cruz lansa ona golu primeiru hodi hatur dadauk rezultadu ba 1-0.
Golu ne’e provoka liu tan adetus sira nia emosaun hodi hakilar makas no baku kalen sira iha kampo ninin.
Gamer halo São Francisco book aan la di’ak hodi fó oportunidade ba jogadór Alexandre da Cruz mesak prodúz golu iha menutu primeiru hahú hosi menutu lima ba menutu hitu, 17 no 19 hodi hatur rezultadu Gamer nian ho golu haat.
Enkuantu São Francisco mantein ho jogu ne’ebé mak iha la ansi halo golu bainhira seidauk hetan oportunidade atu halo golu. Maibé jogu hirak São Francisco halo la hela de’it hanesan jogu konsege fó ptovas nune’e iha menutu 12 jogadór Remigio de Araujo responde golu ida hodi muda rezultadu ba 1-4.
Hakur ba segunda parte ekipa rua nafatin lansa kontra no atake ba malu, ekipa São Francisco halo mudansa total ba sira nia jogu hodi halo presaun makas ba Gamer too Gamer book aan la di’ak no hetan kedan oportunidade hodi hatama golu.
Iha menutu 21, 27 jogadór Gaudencio da Costa lansa golu rua hodi muda rezultadu ba 3-4, iha menutu 33 jogadór Remigio lansa tan golu ida hodi halo jogu ne’e empata ba 4-4.
Hosi rejultadu ne’e hamihis adaun ona Gamer nia esperansa iha kampo laran basa São Francisco domina makas bola iha kamlo mean nia laran.
Ho nune’e iha menutu 27, 36 Sercandio Barros lansa tan golu rua muda rezultadu ba 6-4 hodi hadook rezultadu hosi Gamer nune’e iha menutu 39 jogadór Sebastião de Deus lansa golu ikus hodi fó kedan vitoria ba São Fransico hodi save metin pontu tolu.
Hosi rezultadu ne’e São Fransico mak iha direitu absoluta ba vitoria no Gamer Fc obrigado tenke hela ho derrota hodi hein jogu seluk tuir mai.
Jornalista: Hortencio Sanchez
Editór: Evaristo Soares Martins
