Top

APC sei apoia hodi rekoopera uma 415 ne’ebé afeta ba dezastre naturál

Logotipu Autoridade Protesaun Sivíl. Imajen/Espesiál

DILI, 07 agostu 2023 (TATOLI) – Portavós Autoridade Protesaun Sivíl (APC, sigla portugés), João de Sousa Filipe, dehan APC liuhosi Depatementu Risku no Dezastre halo ona levantamentu dadus ba uma hirak ne’ebé mak afeta ba dezastre naturál ho kondisaun aat ho totál 415 ne’ebé  iha tempu badak sei hetan apoia rekooperasaun.

“Ita hein de’it oráriu hosi ita-nia Depatementu Risku no Dezastre, kuandu sira fó sai ona bainhira atu ba fahe materiál rekooperasaun ita-nia komunidade sira ne’ebé afeta ba dezastre naturál”, João de Sousa hateten ba jornalista iha edifísiu APC Caicoli, segunda ne’e.

Nia esplika, uma ne’ebé mak afeta ba dezastre naturál hahú hosi janeiru to’o inísiu agostu, uma ne’ebé mak afeta ba kauza dezastre naturál hamutuk 1.150, hosi dadus ne’e uma ho kodisaun aat kaman totál 655 no uma ne’ebé ho kategoria uma aat totál 415.

João de Sousa hateten, apoia ba rekooperasaun ne’e bazea ba Dekretu-Lei númeru 7/2021 kona-ba medida protesaun sidadaun ne’ebé kona-ba tipu apoiu uma ne’ebé tama estragus kaman no estragus totál.

“Ita prevé osan hamutuk $850.850 atu fó apoiu rekooperasaun ita-nia komunidade sira ne’ebé afetadu ba dezastre naturál”, nia adianta.

Tuir dekretu-lei refere, medida protesaun sidadaun ne’ebé kona-ba tipu apoiu liuliu ba uma estraga kaman no uma estragu totál inklui hetan direitu ba materia konstrusaun, direitu ba orsamentu ba konstrusaun nian ba harii uma no mós iha orsamentu kustu transporte.

“Ba uma ne’ebé mak hetan estragu naton sei hetan apoia rekooperasaun ho osan $1.000-resin  ho materiál konstrusaun no ba uma sira ne’ebé hetan estragu totál ne’e sei hetan $4.000”, nia konklui.

João de Sousa Filipe rekorda fali karak hosi janeiru to’o inísiu agostu, dezastre naturál hamate ona ema hamutuk na’in-25.

Jornalista: Natalino Costa

Editór : Zezito SIlva

Publisidade

Leave a Reply

Latest Post

error: Content is protected !!