Konstrusaun futuru Sentru Formasaun Profesór Oé-Cusse atinje 80%
OÉ-CUSSE, 07 agostu 2023 (TATOLI) – Diretór Rejionál Infraestrutura, Candido dos Reis Amaral, informa, projetu ba futuru Sentru Formasaun ba profesór sira iha Rejiaun Administrativa Espesiál Oé-Cusse Ambeno (RAEOA) nia progresu fíziku to’o fulan-agostu ne’e atinje ona 80%.
Notísia relevante: Xefe Estadu observa projetu sentru formasaun profesór iha Pante Makasar
“Hela de’it servisu ki’ik sira, ba servisu fíziku hotu ona, tanba tuir kontratu tenke termina iha fulan-setembru ne’e, kompañia halo ona ezersísiu tomak, atu kompleta servisu sira-ne’e, neste mumentu to’o ona 80%, ita hein katak iha semana hirak-ne’e nia laran bele kompleta ona servisu tanba materiál preparadu,” Candido Amarál, ba jornalista sira iha Oé-Cusse, segunda ne’e.
Nia esplika, progresu 80% ida-ne’e falta servisu estrutura, ba zinko no janel hotu ona, hela de’it atu tara odamatan ho servisu ki’ik ona balu mak presiza kompleta.
“Tuir loloos kompañia entrega ba autoridade iha fulan-marsu tinan 2023 ne’e, maibé kompañia atraza iha mobilizasaun materiál nune’e autoridade estende tán hodi konklui iha setembru ne’e,” nia informa.
Entretantu, ezekuta konstrusaun ne’e hosi empreza Irmão Timor Unipesoál Lda númeru valór kontratu $347.755.81, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu durante fulan-haat, hahú iha novembru sei konklui iha fulan marsu 2023.
Purtantu, medida ba konstrusaun ne’e naruk metru 50 kompleta kedas ho fasilidade sira hanesan, sala ba formasaun, sala komputadór, sala administrasaun, sala laboratóriu prátika no fasilidade seluk tan.
Notísia relevante: RAEOA lansa Sentru Formasaun Profesór nu’udar investimentu iha setór edukasaun
Jornalista: Abílio Elo Nini
Editór: Evaristo Soares Martins
