Ofelia hetan valór The 27th K-Speech World Contest iha Singapura
DILI, 07 agostu 2023 (TATOLI) – Ofelia de Jesus Sampaio hanesan estudante Universidade Nasionál Timor-Loros’e (UNTL) nu’udar mós membru ba The Center for Corean Studies konsege hetan valór exelente iha kompetisaun The 27th K-Speech World Contest ne’ebé hala’o iha Singapura semana kotuk.
“Nu’udar joven iha nasaun Timor-Leste sente orgullu no kontente ba partisipasaun eventu “The 27th K-Speech world Contest” ne’ebé organiza hosi Embaixada Korea iha Singapura, realiza iha Nacionál University Singapore, iha 04 agostu semana kotuk”, Ofelia dehan ba Agência TATOLI iha kampus UNTL Dili, segunda ne’e.
Eventu ne’e partisipa hosi nasaun hamutuk 19 inklui Timor -Leste.
“Ha’u nu’udar estudante UNTL, membru hosi CKS reprezenta Timor-Leste iha eventu importante ne’e, ha’u mesak hosi Timor-Leste ba singapura, maibé la’os mesak, iha reprezentante hosi Embaixada Timor-Leste ba Singapura Primeiru Sekretáriu Antonio Soares”, nia esplika.
Timor-Leste tuir eventu K-speech ba dala tolu ona inklui Ofelia, hahú iha tinan 2021 no 2022 iha timoroan na’in-rua ne’ebé aprezenta liuhosi Online (Zoom) tanba kauza hosi pandemia Covid-19.
Enkuantu iha tinan 2023, pandemia Covid -19 laiha ona eventu refere hala’o fali hanesan baibain ne’ebé partisipa direta entre nasaun hotuhotu iha mundu.
Estudante Ofelia hetan valór exelente bainhira halo aprezentasaun diskursu ho lian Korea nian iha eventu ne’e ho tópiku esperiénsia kona-ba Korean Wave.
“Tópiku ne’ebé ha’u foti mak “Esperiénsia kona-ba Korean Wave” ho mehi liuhosi Korean Wave, razaun foti tópiku iha relasaun ho esperiénsia ne’ebé mak ha’u hetan liuhosi K-POP ho K-DRAMA halo ha’u interese hakarak aprende lian Korea no influénsia ema hosi mundu tomak iha interese hakarak aprende lian no kultura Korea, hahú esplora karaterístika hosi nasaun rua ne’e hodi bele kolabora ba malu no iha hanoin atu kontribui globalmente”, nia dehan.
Nia dehan, ekonomia azul ne’ebé proteje nasaun ki’ik Timor-Leste sai furak iha ema hotu nia matan, iha parte seluk, sentru estudu koreanu eziste no dezenvelve iha nasaun hotuhotu no mós iha Timor-Leste, ho nune’e ema hotu tenke servisu hamutuk hodi hametin parseiru entre Timor-Leste ho Korea.
Nia hatutan, esperansa ba futuru, hakarak fanu joven hotu ba partisipasaun másima iha vida akadémika hodi kompete makas ho nasaun seluk no influénsia hosi nasaun ne’ebé ekonomia dezenvolvidu, sai hanesan modelu hodi dezenvolve ekonomia iha nasaun rasik.
Jornalista: Hortencio Sanchez
Editór : Zezito Silva
