PNTL asegura ona mate isin ida iha tasi ibun Tibar

DILI, 07 agostu 2023 (TATOLI) – Polísia Nasionál Timor-Leste liuhosi Unidade Polísia Maritima (UPM), hamutuk ho Komandu PNTL Munisipiu Liquiça, asegura ona mate isin João Soares ne’ebé hetan iha área tasi ibun Tibar, Munisipiu Liquiça.
Mate isin ne’e membru UPM sira hetan iha oras tuku 14:30 segunda(7/8) ne’e, liuhosi informasaun ne’ebé komunidade sira iha área Tibar pasa ba Sentru Informasaun Komandu Jerál PNTL no UPM hamutuk ho Komandu PNTL Liquiça ba kedan iha fatin akontesimentu hodi haree mate isin refere.
Membru UPM hamutuk ho Komandu PNTL Liquiça asegura kedan objetu mate isin sidadaun João Soares hodi translada kedan ba Hospitál Nasionál Guidu Valadares (HNGV, hodi submete ba sala mortuáriu hodi ba autópsia atu hatene motivu hosi sidadaun ne’e nia-mate.
“Ha’u foin simu informasaun katak mate isin ne’ebé ita hetan iha tasi ibun área Tibar ne’e sidadaun ne’e ho identidade João Soares, nia ne’e nudar enfermeiru ne’ebé servisu iha óspitál nasionál”, Komandante UMP Superientendente Polísia, Eugénio Pereira, dehan liuhosi telefone, segunda ne’e.
Nia haktuir, bazea ba informasaun prelimináriu ne’ebé UPM rekolla iha terenu katak sidadaun João Soares iha dader sei kontatu ho nia fen kaben no matebian lori hela ATM ba Banku iha Timor Plaza no sira rua sei hasoru malu, maibé kuandu nia fila hosi fatin ne’ebá, nia telemovél mate ona.
Tanba ne’e mak parte PNTL sei buka tuir motivu loloos hosi João Soares nia mate.
“Por enkuantu ita seidauk hatene motivu hosi matebian nia mate ne’e. Ida ne’e mak ami sei buka tuir hela, atu hatene motivu hosi matebian nia mate”, nia adianta
“Ami mós sei aproxima ho parte óspitál para bele hatene rezultadu autópsia ne’ebé óspitál halo ba matebian. Nune’e ita bele hatene kauza no motivu hosi matebian nia mate ne’e”, nia konklui.
Jornalista: Natalino Costa
Editór : Zezito Silva

