Treinadór futeból 20 tuir formasaun iha Novo Turismo
DILI, 08 agostu 2023 (TATOLI) – Treinadór hosi modalidade futeból tuir formasaun durante semana ida iha Novo Turismo Lecidere Dili hodi haklean liután kapasidade treinadór sira-nian atu fó treinu ba jogadór sira.
Formasaun ne’e fasilita hosi Korea Organization International Cooperation Agency (KOICA) no Project Management Commitee (PCM).
Diretór Nasionál Desportu, Cesarino da Silva iha aberturasaun ba formasaun, hateten Ministériu Juventude Desportu Arte no Kultura (MJDAK) mós iha ona planu atu eleva di’ak liután koñesimentu mínimu sertifikadu B, nune’e treinadór sira iha kompeténsia no sai hanesan treinadór profesionál hodi fó treinu ba jogadór sira.
“Ministériu iha komitmentu no tau iha planu no servisu hamutuk ho KOICA atu fornese formasaun ba ita-boot sira, ne’ebé ba kolega sira aproveita oportunidade didiak durante semana ida nia-laran atu hadia imi-nia koñesimentu no esperiénsia, atu imi hatutan ba boot sira-nia alin sira, tanba durante ne’e maluk balun fo treinu ba alin sira iha resintu MJDAK no kampu Lecidere”, diretór dehan liuhosi komunikadu ne’ebé Agência TATOLI assesu, ohin.
Formasaun ne’e partisipa hosi treinadór na’in-20, kompostu hosi mane na’in-14 no feto na’in-neen.
Prosesu formasaun ba ekipa téknika hosi KOICA-PMC mak responsabiliza no formasaun ne’e nu’udar kooperasaun entre parte sira, hanesan MJDAK, Federasaun Futeból Timor-Leste (FFTL) no KOICA-PMC.
“Atividade ne’e kooperasaun hosi parte tolu mak hanesan KOlCA- PMC, FFTL no mós Governu MJADK, ba treinamentu treinadór sira ba dala rua-nian no antes ne’e halo tiha ona, importante tebes mak formasaun ida ne’e hodi tuir ita bo’ot sira nia koñesimentu”, Cesarino afirma.
Diretór ne’e afirma, Governu liuhosi MJDAK komprometidu ba formasaun ida ne’e no sei servisu hamutuk, FFTL no kooperasaun ho KOICA nian hodi kapasita treinador sira.
Jornalista: Hortencio Sanchez
Editór : Zezito Silva
