Moras oin sanulu rejista aas iha HorEX Baucau
BAUCAU, 09 agostu 2023 (TATOLI) – Ospitál Referál Eduardo Ximenes (HorEX, sigla portugés) durante fulan-neen rejista moras hamutuk sanulu iha sala emerjensia no ambulatóriu.
Xefe departamentu sala emerjensia no ambulatóriu, Claudino Ximenes, esplika, moras sanulu hanesan kanek kauza asidente, trauma, ISPA, isin-manas, stomach, dengue, penomia, apdonomina, asma no ipertensaun.
“Kazu moras sanulu ne’e mak rejista a’as durante fulan-neen iha HorEX Baucau liuhosi sala emerjensia,” Xefe departamentu emerjensia no ambulatóriu HorEX hateten iha Vila Nova, kuarta ne’e.
Moras hirak-refere hanesan asidente kanek kmaan hamutuk 919, kazu trauma 496, infeksaun respiratóriu aguda (Ispa) 403, isin-manas hanesan kmaan no grave 342, stomach 367.
Alende ne’e, pasiente sofre moras dengue hamutuk 319, penomia 232, apdonominál 221, asmatiku ka iss-boot 312 no ipertensaun hamutuk pasiente na’in-160.
Claudino Ximenes, konfesa, durante fulan-neen HorEX Baucau rejista pasiente na’in-10 komposta hosi idade avansadu na’in-hitu no labarik nain-tolu mak halotu iss bainhira halo tratamentu inisia iha sala emerjensia seidauk to’o 48 oras tanba kondisaun grave.
“Bebe sira mai ho kondisaun grave hanesan infeksaun pulmaun no familia sira atende tarde nune’e to’o iha emerjensia hakotu iis, enkuantu ema-boot kauza asidente,” Claudino Ximenes akresenta.
HorEX Baucau mos transporta pasiente sira ba Ospitál Nasionál Guido Valadares (HNGV) hafoin halo atendementu dahuluk hanesan netraliza kondisaun tanba presiza kontinua halo tratamentu.
Jornalista : Natalino Belo
Editór : Evaristo Soares Martins
