DILI, 09 agostu 2023 (TATOLI) – Profesór no Dekanu hosi Universidade Nova Wales Sul (UNSW- Sigla Ingles) Austrália, Stephen J Foster, hamutuk ho komitiva hasoru malu ho Ministru Interiór, Francisco da Costa Guterres, hodi hametin parseria iha área seguransa nian.
“Hasoru Ministru-Interiór no introdúz ami-nia papél Universidade nian nu’udar kriadór no dizeminadór koñesimentu no nu’udar motór prinsipál ba inovasaun, dezenvolvimentu ekonómiku no moris di’ak sosiál, ami mós diskute prioridade estratéjika ba impaktu sosiál iha area seguransa nian, dezastre, redusaun risku no jestaun enjeñaria ambientál no umanitária, infraestrutura rejiliente inklui seguransa bee-mos no enerjia”, Profesór Stephen J Foster dehan hafoin remata enkontru ho MI iha Vila-Verde, ohin.
Nia dehan, durante loron hitu to’o 11 agostu, delegasaun hosi UNSW sei vizita Dili hodi halo interasaun introdutória lubuk ida ho Nasaun Unida, Governu Timor-Leste, Akademia no mós Sosiedade Sivil sira.
“Sorumutu introdutóriu ne’e hanesan parte ida husi asaun lubuk ida-ne’ebé UNSW hahú hodi kontribui atu harii relasaun institusionál sira ba estabelesimentu no reforsu parseria koñesimentu estratéjiku sira ne’ebé tulun hasoru dezafiu dezenvolvimentu sustentável sira iha rejiaun Ázia Pasífiku”, nia dehan.
Tuir Profesór Stephen, prioridade estratéjika ba impaktu sosiál husi Universidade ne’e kompromete atu taka problema sira iha mundu reál liuhosi parseria sira ne’ebé halibur estudante sira, pesoál sira, alumni sira no komunidade sira, hodi aliña esforsu ho esperiénsia no forsa peskiza husi UNSW ba Dezenvolvimentu Sustentável Nasaun Unida nian.
“Ami sente kontente bele hasoru malu ho ministru no ohin ami halo ona introdusaun institusionál hodi buka komprende imperativu estratéjiku sira Ministériu Interiór nian hodi bele esplora parseria institusionál ba advokasia no kolaborasaun, liuliu atu kontribui ba Objetivu Dezenvolvimentu Sustentável (SDGS) no impaktu sosiál iha Timor-Leste”, nia salienta.
Professor Stephen hatutan, liuhosi apoiu no Programa Formasaun Diplomasia, ne’ebé harii husi Prezidente Ramos-Horta iha UNSW iha tinan 1989, UNSW iha ligasaun naruk ho Timor-Leste. Hahú husi tinan 2009, peskizadór sira husi UNSW apoiu ona reforsu sistema saúde publika iha parseria ho Ministeriu Saúde no foin lalais ne’e, UNSW fornese ona formasaun pos-graduaduadu iha área jeolojia ekonómika hodi apoia Ministériu Petroleu no Minerál atu UNSW buka atu harii istória ida-ne’e hodi hakle’an liután ninia envolvimentu institusionál iha Timor-Leste.
Iha okaziaun ne’e, Ministru Interiór, mós hato’o agradesimentu ba delegasaun UNSW hosi Austrália tanba bele esforsu ho vontade no hanoin di’ak servisu hamutuk hodi apoia Guvernu Timor-Leste iha area seguransa nian.
Jornalista: Hortencio Sanchez
Editór : Zezito Silva
