Agostu no setembru: Timoroan 12 sei ba estuda iha Japaun
DILI, 10 agostu 2023 (TATOLI) – Governu Japaun liuhosi nia Agência Japan International Cooperation Agency (JICA) fasilita timoroan hamutuk na’in-12 atu hala’o estudu iha Japaun iha tempu badak.
“Iha fulan agostu no setembru, timoroan na’in-12 sei ba Japaun hodi aumenta sira-nia matenek iha area oioin, hahú hosi biologia, engeñaria elétrika, konsolidasaun páz, dezenvolvimentu ba feto ne’ebé fila liman sira (entrepreneurship), prevensaun risku to’o saúde públiku, iha universidade hitu iha Japaun”, tenik iha komunikadu ne’ebé Agência TATOLI asesu hosi JICA, ohin.
JICA fó tulun liuhosi bolsu estudu ba timoroan kualifikadu sira atu hala’o estudu ba Masteradu no Doutoramentu iha Japaun.
Prosesu estudu iha Japaun, timoroan sira sei utiliza lian inglés hodi aprende iha matéria hotu ne’ebé sei fó hosi Universidade.
“Ohin bolseiru sira mai hamutuk iha JICA nia edifísiu atu partisipa iha semináriu hodi fahe informsaun kona-ba JICA ninia organizasaun no atividade sira iha Timor-Leste, antes sira ba Japaun”, tenik tan iha komunikadu ne’e.
Iha okaziaun ne’e, durante menutu 30 JICA nia Xefe Reprezentativu iha Timor-Leste Mimpei Ito, fahe esperiénsia ba bolseiru sira kona-ba oinsa mak moris hanesan estudante iha Japaun.
“Informasaun ne’ebé importante kona-ba oinsa atu bele hala’o moris nu’udar estudante iha ne’eba, husu atu bolseiru sira wainhira fila mai atu bele halao dezenvolvimentu nasional”, Mimpei Ito afirma.
Ho nune’e, Ito hein katak bolseiru sira bele sai nu’udar matadalan ne’ebé di’ak ba nasaun Timor-Leste no Japaun.
Jornalista: Hortencio Sanchez
Editór : Zezito Silva
