Estrela Baguia “liki” Kablaki 6-2
DILI, 09 agostu 2023 (TATOLI) – Ekipa segunda divizaun Liga Futsal Timor-Leste Estrela Baguia FC susesu iha nia jornada primeiru hodi “liki” nia adversáriu Kablaki Fc ho rezultadu 6-2.
Jogu ba ekipa rua hala’o iha kampu Futsal Falintil-Forsa Defeza Timor-Leste (F-FDTL) Fatuhada Dili, kurta kalan.
Hanesan baibain, jogu hahú ekipa rua lansa kedan kontra no atake ba malu tuir tékniku no abilidade ekipa idaidak nian hodi buka hatama golu liuhosi finta bola ba mai iha kampu azul nia laran be hafutar ho kor mutin nia leten.
Iha jogu ne’e, Estrela Baguia domina bola iha jogu primeiru iha menutu rua jogadór Nelio Martins lansa ona golu primeiru muda rezultadu ba 1-0, tanba domina liu bola ho forsa ne’ebé iha jogadór Nelio kontinua hatudu nia kbiit hodi halo tan golu iha menutu ualu hodi hatúr rezultadu ba 2-0.
Kablaki movimenta la di’ak tanba hetan presaun makas hosi Baguia iha menutu 17 jogadór Carlos de Fatima lolo tan golu hodi hadook rezultadu ba 3-0.
Jogu la’o la kleur tan iha menutu 18 jogadór Danilson Araujo prodúz golu halo rezultadu dook liu tan ba 4-0.
Maske nune’e, Kablaki lakoi ho zero nune’e jogadór sira esforsu makas no esforsu hirak ne’e la sai de’it hanesan esforsu nune’e iha menutu 19 jogadór Kablaki João Borges responde golu ida muda rezultadu ba 1-4.
Maske golu maibé Kablaki laiha ona kbiit hodi duni tuir Baguia ne’ebé iha ona golu barak ho nune’e Baguia kontinua lansa kontra no atake ne’ebé másimu tebes iha menutu 30 jogadór Danilson fura tan rede Kablaki hatúr rezultadu ba 5-1.
Jogu la’o ho emosaun liután maibé vitória provizóriu iha ona Baguia nia liman, nune’e iha menutu 32 jogadór Osvaldo do Rego halo golu ikus nakfilak rezultadu ba 6-1.
Maibé Kablaki hatudu nia espertu lakohi hela de’it ho golu ida iha menutu 35 jogadór Octaviano dos Santos halo golu ikus hametin rezultadu ba 2-6.
Hosi rezultadu ne’e, Baguia direitu absoluta ba vitória no Kablaki tenke hela ho derrota hodi hein tan jogu tuir mai.
Jornalusta: Hortencio Sanchez
Editór : Zezito Silva
