Ministru Nélio: Eventu joven ba kristu dalan di’ak ba fahe esperiénsia
DILI, 11 agostu 2023 (TATOLI) – Ministru Juventude Desportu Arte no Kultura (MJDAK) Nélio Isaac Sarmento, dehan eventu Joven ba Kristu nu’udar dalan di’ak hodi buka no fahe esperiénsia entre joven katolika sira.
Tanba ne’e, membru Governu ne’ebé toma konta mós ba juventude ne’e husu ba joven sira ne’ebé partisipa iha eventu joven ba kristu atu uza didi’ak oprtunidade ne’e hodi aumenta abilidade no koñesimentu.
“Importante ba joven sira, ohin loron uza oportunidade ho di’ak, Estadu ne’e nia ulun, inan no aman no parokia sira husu de’it imi-nia tempu signifika imi la hetan buat ruma, tenke buka esperiénsia hodi aumenta imi nia skill no koñesementu”, Ministru Nélio dehan liuhosi komunikadu ne’ebé Agência TATOLI asesu, ohin.
Iha konstrusaun Estadu, ministru esklarese, presiza joven sira-nia tempu atu aprende iha paroki ida-idak, fó tempu atu aumenta kapasidade ba ida-idak nian.
“Ha’u hakarak mai hodi firmeza no komitmentu fiar ba Aman Maromak buat hotu sei rezolve ho di’ak”, ministru dehan.
Governante ne’e mos husu ba joven sira atu moris iha dame ba malu tuir Jesus Kristu nia dalan.
“Nafatin agradese ba Aman Maromak tanba kuidadu no akompañia, dala ruma hetan problema nu’udar ema sala nain, lases husi sala hanesan, Amu papa nia liamenon hanesan ne’e iha mundu ne’e, la iha ema ida perfeitu liu, la iha dalan atu fó perdua ba malu, so úniku dalan ida de’it mak mai husi nain Jesus de’it, ita ema ho kor ne’ebé la hanesan mais ita ida de’it iha maromak nia matan, la tempu ona atu rai ódiu ba malu, haterus malu ba beibeik ho sentimentu ódiu malu hodi hamonu malu no la iha dame entre ita ho ita”, nia hakotu.
Jornalista: Hortencio Sanchez
Editór : Zezito Silva
