MNEK: Indonézia selebra nia Independénsia ba dala-78, fortelese kooperasaun liután
DILI, 17 agostu 2023 (TATOLI) – Ministru Negósiu Estranjeiru no Kooperasaun (MNEK) Bendito Freitas, dehan Indonézia liuhosi nia Embaixada iha Timor-Leste selebra nia aniversáriu bad ala-78, tanba ne’e prezensa MNEK nian iha serimónia bele fortifika liután kooperasaun entre nasaun rua.
“Ita-nia partisipasaun iha komemorasaun loron independénsia Indonézia nian importante tebes atu fortifika tan kooperasaun ne’ebé ita iha ho Indonézia, ita iha relasaun ne’ebé naruk tebes to’o agora”, ministru hateten ba jornalista-sira iha edifísiu Embaixada Indonézia Farol, ohin.
Nia dehan, partisipasaun ne’e importante mós tanba Indonézia agora hanesan Xefe ba ASEAN nian ne’ebé apoiu másimu tebes adezaun Timor-Leste ba ASEAN.
“Ida ne’e hanesan manifestasaun ida ba ita-nia solidaridade iha polítika, ba kooperasaun bilaterál, sentidu estadu nudar rejionál iha ASEAN ne’e iha Timor-Leste, presiza barak hosi Indonézia atu tulun durante aplikasaun kandidatura ba ASEAN, ida ne’e ita atu konsolida ita-nia relasaun di’ak ba oin”, nia afirma.
Iha fatin hanesan, Embaxadór Indonézia iha Timor-Leste Octo Dorinus Malik, hateten relasaun Indonézia ho Timor-Leste kontinua di’ak nafatin ba oin hanesan maun alin hodi tulun malu nafatin.
“Relasaun ita-nia ba oin di’ak ba nafatin, ita hanesan maun alin nafatin tulun malu iha prosesu saida de’it, ida ne’e mak ami-nia pozisaun”, Embaxadór Octo revela.
Indonézia mak hanesan Xefe ba ASEAN tanba ne’e mantein apoiu másimu ba Timor-Leste nia kandidatura atu sai hanesan membru permanente.
Jornalista: Hortencio Sanchez
Editór : Zezito Silva
