DILI, 17 agostu 2023 (TATOLI) – Responsável másima ba Tasa Esperansa Domingos Caero, relata objetivu hodi hamosu Tasa Esperansa mak atu buka fini jogadór futeból ne’ebé di’ak no hametin liután unidade entre juventude sira.
“Tasa Esperansa ne’e iha tinan hira ba kotuk iha ona, maibé la konsege la’o, entaun ami grupu kiikoan ida iha inisiativa atu hamoris fali tasa ne’e, atu bele buka fini jogadór no hametin unidade joven sira-nian, tanba ita haree agora joven barak buka de’it problema”, Domingos dehan ba jornalista-sira iha Lecidere Dili, ohin.
Nia dehan, jogu ne’e prioridade liubá estudante ensinu sekundáriu sira iha Dili laran no jogu ne’e sei hala’o kada eskola mak kontra malu.
“Jogu ida ne’e ami konsentra de’it ba estudante sekundáriu sira iha Dili laran, ita liuhosi estudante sira atu nune’e bele armoniza sira atu iha sentimentu patriotizmu entre sira hadook sira hosi konflitu horizontál, tanba ita haree konflitu agora ne’e mesak joven idade kiik de’it, ida ne’e mak ami hanoin loke fila fali tasa ne’e no sei konsentra de’it iha Dili laran”, nia dehan.
Tasa ne’e atu komemora mós loron Falintil bada la-48 no komemora mós loron konsulta populár bada la-24.
“Jogu ida ne’e atu loke mós ita-nia alin sira-nia hanoin katak luta ba ukun rasik aan ne’e la’os buat fasil, maibé liuhosi prosesu no sakrifisiu”, nia relata.
Jogu ne’e fó oportunidade ba eskola sekundária hamutuk 16 iha Dili laran, kompostu hosi Postu Administrativu ida eskola haat hanesan, Dom Aleixo eskola haat, Veracruz haat, Cristo Rei haat no Nain feto haat.
Eskola hirak ne’e mak hanesan 12 de Novembru, Sakrada Korasaun de Jesus, Eroi da Patria, EC Becora, 28 de Novembru, Extrenato Saão José, St. Madalena de Canossa, Anur, São Pedro Comoro, São Miguel, Paulo VI, São José Operariu, Cristal, 04 de Setembru, eskola Café Taibessi no eskola Seminariu Menor maibé la bele partisipa tanba estudante maioria idade sei kiik ho nune’e komisaun hanoin ona atu troka ho eskola Nicolau Lobato Tasi-Tolu.
Iha fatin hanesan, Vise Koordenadór ba Tasa Esperansa Adilson Ribeiro reforsa jogu ne’ebé hala’o hetan apoiu másima hosi patrosinadór prinsipál hanesan, Eto+, Gota, Britas no Kafé Timoroan.
“Jogu ne’e ita hetan suporta másima hosi ita-nia patriosinadór sira, ne’ebé iha jogu ne’e rejistrasaun eskola sira sei la fó osan, ami mak sei ajuda orsamentu oituan ba sira, ami mak prepara farda ho meas ba sira, sira hein mai joga de’it”, Adilson refere.
Iha sorin seluk, diretór kompetisaun João Campos reforsa, jogu ne’e sei hala’o ho modelu metade kompetisaun no sei abertura iha 30 agostu agora ho durasaun loron 20.
“Jogu ne’e ita sei hala’o stenga kompetisi ka metade kompetisaun, ba primeiru lugar sei simu osan $2000 ho medalla, segundu lugar sei simu $1500 ho medalla, terseiru lugar simu $1000 ho medalla no kuartu lugar sei simu $500 ho medalla”, nia informa.
Aleinde ne’e, ba klube hotu ne’ebé partisipa sei hetan sertifikadu rekoñesimentu hosi komisaun.
Totál orsamentu ne’ebé apoiu hosi patrosinadór labele fó sai ba públiku maibé konsidera hanesan konfidensiál.
Jogu ne’e sei utiliza kampu Federasaun Futeból Timor-Leste (FFTL) no ábitru ne’ebé dirije jogu komisaun sei kontratu ho Asosiasaun Arbitrajen Timor-Leste atu nune’e bele hala’o jogu ho susesu.
Jornalista: Hortencio Sanchez
Editór : Zezito Silva
