Tinan oin SLB sei realiza voleiból praia internasionál iha Dili
DILI, 17 agostu 2023 (TATOLI) – Sekretáriu Jerál klube AD SLB Laulara Domingos Caero, informa tinan oin sei realiza voleiból praia ho kategoria internasionál iha Dili.
“Ita halo ona proposta ida, hein de’it atu submete ba Prezidente klube maun boot Kay Rala Xanana Gusmão, oinsa mak ita atu realiza volieból praia internasionál ida iha Dili”, Domingos dehan ba jornalista-sira iha Lecidere Dili, ohin.
Prosesu hotu la’o ona no SLB sei konvida klube Choque atu tur hamutuk haree oinsa bele realiza hamutuk eventu internasionál ne’e.
“Klube internasionál sira ne’ebé ita atu konvida mai ne’e hosi Indonézia, Austrália no Malázia, ita hala’o eventu internasionál ida atu hametin liután ita-nia amizade no halo ita-nia nasaun ne’e moris ho atividade desportiva”, nia relata.
Jogu internasionál ne’e tenta atu fanun Federasaun Desportiva hotu iha Timor-Leste atu book-aan no promove atleta sira nia talentu.
“Ita tenke book-aan agora ona, tinan sira liubá ne’e mosu problema barak, hanesan Covid-19, estabilidade Governativa mós ladún la’o di’ak, maibé agora ita tenke hala’o atividade sira nune’e bele dezenvolve jogadór sira-nia talentu”, nia dehan.
Estimasaun ba eventu ne’e parte klube sei halao kalkulasaun no seidauk bele fó sai ba públiku.
Jornalista: Hortencio Sanchez
Editór : Zezito Silva
