Top

Tribunál aplika AP ba Arguidu na’in-lima envolve kazu prodús Bomba Molotov

Primeiru interogatoriu ba joven nain lima neebe produs ou halo bom molotov atu ataka organizasaun PSHT, iha tribunal judisal primeira distansa dili, kuarta 17/8/2023.Imajen/TATOLI

DILI, 17 agostu 2023 (TATOLI) – Tribunál Judisiál Primeira Instánsia Díli (TJPID), aplika medida koasaun Aprezentasaun Periódika (AP) ba arguidu na’in-lima ne’ebé prodús Bomba Molotov hodi prepara atu halo asaun hasoru membru PSHT ne’ebé fila hosi graduasaun iha Tibar foin lalais. Arguidu sira ne’e ho inisiá AC, GdC, PdA, FS no EdA.

Durante Interogatóriu Dahuluk, Ministériu Públiku, ne’ebé reprezenta hosi Prokuradór Simão Soares, promove arguidu sira ho krime arma proibida ne’ebé previstu iha artigu 211 hosi Kódigu Penál Timor-Leste no krime arma branka hosi lei númeru 5/2017, artigu 41 kona materia explozivu.

Hosi artigu 211, iha alinea 1 refere katak  sé maka iha situasaun ne’ebé lei la autoriza, fabrika, importa, transporta, fa’an ka fó ba ema seluk arma fogu, arma kímika, arma biolójika, arma nukleár, munisaun ba arma sira-ne’e, substánsia atu fabrika arma sira-ne’e ka ba 295 sira atu funsiona ka explozivu tipu seluk-tan sei hetan pena prizaun tinan 2 to’o tinan 6.

Iha interogatóriu ne’e arguidu sira rekoñese sira mak prodús duni Bomba Molotov, maibé sira prodús Bomba Molotov ne’e tanba sira koriozu atu hatene oinsá halo Bomba Molotov.

Maibé arguidu sira nia prátika ne’e halo ema pániku tanba sira prodús buat ne’e atu soe ba membru PSHT sira ne’ebé mak fila hosi atividade gradusaun iha Tibar, tanba ne’e mak autoridade seguransa ba halo detensaun.

Hafoin rona tiha deklasaun arguidu sira nian, Ministériu Públiku iha alegasaun husu ba Tribunál atu aplika medida koasaun AP ba arguidu sira kada semana rua dala ida.

Parte Defeza hosi arguidu sira, Defensór Públika José Guterres aseita ho medida koasaun ne’e tanba arguidu sira ne’e maioria nudar estudante.

Ho nune’e, ikus mai Tribunál liuhosi Juiz Turnu Alvaro Maria Fátima liuhosi nia despaixu aplika aprezentasaun ba arguidu nai lima.

“Arguidu na’in-lima ne’e Tribunál aplika medida Aprezentasaun Periodika kada semana rua dala ida, aguidu sira tenke aprezenta aan ba Eskuadra PNTL ne’ebé besik”, Defensór Públika José Guterres hateten ba jornalista iha Tribunál Díli, kinta ne’e.

Rekorda fali katak arguidu sira ne’e Polísia Nasionál Timor-Leste (PNTL) liuhosi ekipa konjuta ne’ebé hosi Servisu Informasaun Polísia (SIP), Servisu Nasionál Intelijénsia (SIN),Unidade Falintil no Departamentu Investigasaun Kriminál (DIP), detein suspeitu na’in hitu ne’ebé prodús Bomba Molotov hodi prepara atu halo asaun hasoru membru PSHT hafoin simu graduasaun iha Tibar.

Bainhira ekipa konjunta simu informasaun hosi fonte balun iha área Masilidun Tasi-Tolu, Suku Comoro, Postu Administrativu Dom Aleixo katak joven balun iha área refere halibur hela sasan atu prodús Bomba Molotov hodi ataka membru PSHT.

Maibé planu sira ne’e la konsege tanba parte autoridade seguransa liuhosi ekipa konjunta halo kedan intervensaun rápida hodi lokaliza joven hirak ne’e nian atividade no iha segunda (14/8) iha  oras 20:00 ekipa konjunta halo kedan detensaun ba joven sira ne’e ho fráglante delitu.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!