DILI, 18 agostu 2023 (TATOLI) – Prezidente klube primeira divizaun Liga Futeból Timor-Leste (LFTL) Adilson Ribeiro, informa sei halo revizaun ba estatutu klube nian atu loke liras tan ba modalidade sira seluk hanesan voleiból, basketból no seluk tan.
“Ami agora hamrik hanesan klube futeból la loke liras ba modalidade sira seluk hanesan voleiból no basketból entaun ami sei halo revizaun ba estatutu klube nian, entaun ami sei halo duni revizaun atu fó oportunidade mai ami harii mós voli no basket”, Adilson dehan ba Agência TATOLI iha, Lecidere Dili, ohin.
Nia dehan, buat hotu halo ona oinsa atu integra aan hanesan assosiasaun desportiva la’os de’it klube.
“Tinan oin ami iha kongresu no reuniaun jerál klube nian ami sei halo mudansa buat balu iha estatutu ne’e rasik, atu Karketu bele loke nia liras luan oituan ba desportu seluk”, nia hakotu.
Dadaun ne’e, Karketu hanesan klube futeból ne’ebé eziste iha Timor-Leste no hetan legalidade hosi Ministériu Justisa ho nia estatutu rasik.
Jornalista: Hortencio Sanchez
Editór : Zezito Silva
