DILI, 18 agostu 2023 (TATOLI) – Komandu Jerál Polísia Nasionál Timor-Leste (PNTL), louva servisu Unidade Espesiál Polísia (UEP) tanba tinan 14 ona eziste hatudu mudansa barak liuliu kuandu mosu problema UEP ba atua sempre uza komunikasaun no la’os ona ho arma.
“Prezensa Unidade Espesiál Polísia (UEP) sesaun ida nian rezolve problema ema atus ida nian, maibé nafatin hatún imi-nia profisionalizmu iha servisu. Ita avalia hahú hosi hamrik to’o mai ohin loron iha mudansa barak iha Unidade Espesiál, tanba ne’e mak imi nafatin mantein disipliña hatudu imi-nia progresu ida ne’e. Buat ne’ebé mak ha’u nota imi hahú rezolve problema ho matenek no komunikasaun duké imi uza arma, ida ne’e maka imi-nia kestaun pozitivu maka ha’u observa durante ne’e”, Komandante Jerál Polísia Nasionál Timor-Leste (PNTL), Komisáriu Jerál Polísia, Henrique da Costa iha nia intervensaun iha serimónia Aniversáriu Unidade Espesiál Polísia (UEP), Bairru Pite, sesta ne’e.
Nia apela ba membru PNTL sira liuliu Unidade Espesiál Polísia atu kuda iha laran no imi-nia laran hodi disipliña ne’ebé makas servisu makas no hatudu kualidade iha instituisaun ba povu no ba nasaun.
“Naran unidade espesial tenke hatudu imi-nia espesialidade iha parte sira hotu. Hatudu imi-nia disipliña, hatudu imi-nia kualidade, kuandu imi-nia disipliña”, nia adianta.
Nia hateten, moto UEP mak sei sai hanesan brasu direita Polísia Nasional Timor-Leste ninia tanba ne’e, prezensa unidade espesiál liuliu sesaun ida nian rezolve problema ema atus ida.
Iha fatin hanesan, Komandante Unidade Espesiál Polísia (UEP), Superintendente Polísia Damião Coreia, hateten dezde 2009 sei iha difikuldade oinoin hanesan falta rekursu umanu no viatura.
Tanba ne’e, husu Governu atu kontinua investimentu iha UEP atu profisionál liután ba oin.
“Unidade Espesiál Polísia sempre halo nia misaun di’ak, maibe presiza investimentu iha rekursu umanu no rekursu materiál liuliu atu hadia kondisaun ba ita-nia instalsaun materiál no ekipamentu sira atu bele iha preparasaun ne’ebé di’ak atu bele konfronta dezafiu sira ne’ebé sei mai bainhira Timor-Leste sai ona membru permanente ASEAN”. nia dehan.
Nia esplika, UEP presiza aumenta nian sub unidade operasasionál tolu liuliu espesialidade orden públik, espesialidade anti tereorizmu no inativasaun espesiál explousaun atu nune’e bele kumpre di’ak liután nian misaun.
Nia dehan, UEP tenke iha transporte ne’ebé di’ak mak bele servi iha operasaun, maibé transporte tenke garantia operasionál ho di’ak liu.
Komandante UEP ne’e husu Governu kria kazerna ne’ebé di’ak liu iha Díli, Baucau no Maliana atu garante kondisaun ba membru atu kumpre servisu iha 24 oras.
Hatan ba kestaun ne’e, Ministru Interiór Francisco Guterres hateten Governu kompremetidu kontinua apoiu PNTL atu sai profisionál liután.
Nia husu ba UEP atu mantein disipliña no hatudu servisu ho profisionál tuir doutrina PNTL nian hodi fó seguransa ba povu no nasaun.
“Ha’u mai husu ba ita bo’ot sira hotu iha unidade espesiál, imi tenke halo imi-nia servisu ho di’ak, imi tenke mantein imi-nia aan hanesan Polísia Nasionál ne’ebé servi povu ba nasaun no ba Estadu ida ne’e”, nia afirma.
Nia husu ba PNTL tenke hatután mehi eroi sira-nia ne’ebé mate hodi liberta povu no pátria.
Jornalista: Natalino Costa
Editór : Zezito Silva
