Top

PNTL detein suspeitu na’in-lima konfornta Manumeta Raihun

Komandante Sup Xefi Munisípiu Dili, Orlando Gomes, ho ekipa hala'o dialogu ho komunidade Vusu Vila-Verde hodi buka solusaun ba konfrontu iha Manu Meta Rai-hun, segunda (21/08). Imajen Tatoli/Francisco Sony

DILI, 21 agostu 2023 (TATOLI) – Polísia Nasionál Timor-Leste (PNTL) konsege detein suspeitu na’i-lima ne’ebé deskonfia envolve iha kazu konfontu iha área Manumeta Raihun, Aldeia Mate Moris, Suku Villa Verde, Postu Administrativu Vera Cruz Munisípiu Díli.

Kazu ne’e akontese iha domingu (20/8) horseik mosu konfrontu ida iha área Manumeta Raihun, Aldeia Mate Moris tanba kauza hosi membru Grupu Arte Marsiál no Persaudaraan Setia Hati Terrate (PSHT) no Grupu Arte Rituál 77.

Hosi kazu ne’e dekonfia katak komunidade sira iha área Manumeta Raihun hetan ataka hosi Grupu Arte Rituál hosi fatin seluk mak mai halo asaun tuda no baku joven iha área refere nune’e mosu konfrontu bo’ot to’o taa joven ida iha Manumeta Raihun no agora daudaun vitíma halo hela tratamentu iha Hospitál Guidu Valadares.

Hosi konfrontu ne’e mós rezulta komunidade nia uma ida hetan estragu tanba hetan tuda no komunidade sira iha Manumeta Raihun sente la seguru to’o balun evakua horikalan mai iha Sede Suku Vila Verde no balu hader de’it tanba hetan tuda, maibé Unidade Espesiál Polísia no BOP halo kedan atuasaun.

“Iha konfrontu ne’e rasik ita konsege detein ema na’in-lima, ida ita halo de’it prosesu identifikasaun ba nia no iha na’in-haat mak ita detein ona iha sela Komandu PNTL Munisípiu Díli hodi submete ba oras 72, hodi submete ba prosesu tuir mai”, Komandante PNTL Munisípiu Díli Superintendente Xefe Polísia Orlando Gomes hateten ba jornalista sira iha Sede Suku Vila Verde, Segunda, ohin.

Nia dehan, Komandu PNTL sei monta Postu Polísia provizóriu iha Manumeta RaiHun atu prevene konflitu iha área refere.

“Ita mós sei monta Postu Polísia provizóriu iha Manumeta Raihun hodi koloka ita-nia membru sira iha ne’ebá para prevene konflitu iha área ne’ebá atu komunidade sira sente livre halo sira nian movimentu”, nia dehan

Vítima, Julia da Gama Conceicão konta, problema ne’e dezde 13 agostu, joven hirak ne’ebé mai halo problema, mai hosi fatin seluk hodi estraga uma.

“Problema ne’e hahú akontese dezde iha loron 13 fulan agostu no kontinua mak to’o mai horikalan ne’e sai tiha konfrontu bo’ot ne’e”, nia dehan.

Nia esplika, ema ne’ebé envolve iha konfrontu ne’e la’os maihosi joven sira hela iha área Manumeta Raihun maibé joven sira ne’ebé mai hosi fatin seluk sira mai halibur malu iha Manumeta Raihun halo provokasaun to’o mosu konfrontu.

“Husu ba parte Polísia atu kontinua kontrola área konfrontu ne’e atu situasaun ne’e seguru fila fali atu komunidade sira iha fatin sente pániku no tauk”, nia konklui.

Iha fatin hanesan, Xefe Aldeia Mate Moris, Verônica de Rosário Câmara da Silva, rekoñese joven sira ne’ebé envolve kazu konfrontu iha área Manu Meta Raihun, Aldeia Mate Moris ne’e la’os hosi Aldeia Mate Moris nian, maibé sira hosi fatin seluk mak mai halo problema iha ne’e.

“Horikalan polísia sira ka’er suspeitu sira ne’e aprezenta mai ha’u lakoñese joven sira ne’e,”nia dehan.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!