PNTL husu inan aman kontrola oan sira iha tempu kalan

DILI, 21 agostu 2023 (TATOLI) – Komandante Unidade Espesiál Polísia (PNTL), Superintendente Polísia Damião, husu ba iman no aman sira atu kontrola oan sira-nia movimentu iha tempu kalan, atu sira labele influénsia ho ambiente ransu arbiru hodi envolve iha krime sira.
“Inan no aman sira tenke kontrola ona sira-nia movimentu iha tempu kalan, kuandu oan sira atu sai ba fatin ruma tenke hatene tuir, tenke kontrola sira ho di’ak oras han no oras estuda, tenke implementa ba sira no kuandu iha tempu deskansa sira tenke haree sira kompletu ka seidauk”, Superintendente Polísia Damião iha nia intervensaun iha serimónia diálogu komunitáriu ne’ebé hala’o iha Sede Suku Vila Verde, segunda ne’e.
Damião hateten, rai ida ne’e nia futuru mak labarik sira ne’e, maibé agora inan no aman sira koalia labarik la rona, entrega hotu ba polísia entaun responsablidade morál iha ne’ebé.
“Labarik ki’ik oan, tinan 12 no tinan 13 mak imi koalia la rona, razaun saida imi inan aman lakon moral, hotuhotu entrega ba polísia entaun imi nia responsablidade mak saida, imi labele hanesan ne’e”, nia dehan.
Iha biban ne’e, Komandante UEP ne’e mós husu ba komunidade sira liuliu juventude arte marsiál no rituál bainhira mosu problema ruma, tenke buka malu rezolve.
“Problema mosu, tanba ema mak autór. la’os halo tiha problema, depois imi haree de’it maibé la hatene buka malu, tur hamutuk atu buka solusaun”, nia afirma.
Nia dehan, dala barak joven sira la koopera, tanba dala ruma halo tiha problema maibé la hatudu suspeitu mak ida ne’ebá, vítima mak ida ne’ebá, maibé joven halo tiha tiha problema ba subar fali, piór liu inan no aman defende fali nia oan sira.
Iha fatin hanesan, Komandante PNTL Díli Superintendente Xefe Polísia Orlando Gomes, husu ba joven sira atu foku ba estuda tanba futuru nasaun nia.
“Husu ba joven sira tenke estuda no koopera hodi estabiliza iha bairru, nune’e garantia pás no estabilidade. Ba joven arte marsiál sira labele uza farda la’o iha estrada públika farda ne’e bele hamosu provokasaun oinoin”, nia fó hanoin.
Nia dehan, iha regulamentu KRAM nian farda ne’e só uza bainhira treinu, kuanud remata treinu labele uza lao ba estrada públiku, ne’e lei bandu.
Administradór Postu Administrativu Vera-Cruz, Manuel Gusmão, reforsa diálogu komunitáriu sira ne’e importante oinsá atu fó hanoin ba grupu arte marsiál sira hodi konsiénsializa joven labele mete problema.
“Ohin, komandante dehan, sé imi la koopera, situasaun mosu mak hanesan ne’e, ita tau todan ba sé tanba ne’e, ha’u nia mensajen mak ne’e, konsiénsia de’it”, nia fó-hanoin.
Jornalista: Natalino Costa
Editór : Zezito Silva

