PNTL husu lider GAM no GAR kontrola membru labele fase liman
DILI, 21 agostu 2023 (TATOLI) – Segundu Komandante Polísia Nasionál Timor-Leste (PNTL), Komisáriu Polísia Pedro Belo, husu ba lider Organizasaun Arte Marsiál (GAM) no Arte Rituál sira atu kontrola membru sira atu labele kria problema iha sosiedade.
Nia dehan, agora daudaun mosu fali konfrontu kuaze kalan iha bairro sira iha kapitál ne’ebé suspeita hosi Grupu Arte Marsiál no Grupu Arte Rituál hodi estraga komunidade sira-nia uma iha área Manumeta Rai Hun, Aldeia Mate Moris, Suku Villa Verde ne’ebé rezulta sidadaun ida hetan taa no sidadaun balun kanek no uma rahun tanba kauza hosi konfrontu ne’e.
“Grupu sira ne’e halo demais ona, kalan ema la toba hakmatek, la’os iha barru ida ne’e de’it, iha bairro seluk mós halo ba komunidade mós moris la hakmatek. Ami-nia polísia sira mós tur la metin, kalan sira la’o to’o fali loron hanesan ne’e”, Komisáriu Polísia Pedro Belo bainhira hala’o vizita ba vítima sira iha Manumeta Rai Hun Suku Vila Verde, Postu Administativu Vera Cruz, Munisípiu Díli, segunda ne’e.
“Tanba ne’e mak ami husu ba organizasaun arte marsiál nia bo’ot sira, imi hotu tenke hambrik metin para haree sasan sira ne’e, labele fase liman, para hanesan ne’e’’, nia dehan.
“Ami mós sei la tolera kuandu ema ruma mak intervene ami-nia servisu, ami hateten kedas, la iha ida atu intervene ami-nia servisu kuandu ami halo operasaun, polísia nia servisu ne’e polísia nia servisu”, nia adianta.
Nia hateten, PNTL sei la husik lider arte marsiál sira atu sira fase liman, la’o tun la’o sae, kuandu ninia membru ida envolve iha konfrontu.
Membru GAM no GAR sira kuandu halo problema iha bairro ida depois ba fali bairro seluk hodi husu ajuda ba nia kolega sira mai envolve konfrontu ne’e, la’os individu ona ne’e responsablidade lider sira-nian.
Belo hateten, atu prevene problema sira ne’e mak labele mosu ba oin, PNTL ne’e sei foti medida forte ba hasoru sé de’it mak atu kria problema iha bairro.
“Oras ne’e dadauk ha’u nia polísia sira organizadu ona, agora ha’u orienta sira hotu iha ne’e, bairro sira ne’ebé risku ba konflitu, PNTL sira tenke identifika atu bolu lider arte marsiál atu labele tuda tan komunidadade nia uma”, nia afirma.
Nia dehan ema hakarak sente seguru, livre hodi halo movimentasaun iha ukun-aan ida ne’e, kuandu joven sira ka ema ruma halo provokasaun hodi kria konfrontu iha bairro hodi limit ema seluk nia movimentu ka hakarak, tuku malu ne’e, mai tuku malu ho polisia ka forsa sira de’it.
“Ami prontu hasoru imi, la’os imi hatudu imi nia asaun ba ema kbi’it la’ek sira”, Belo dehan.
Jornalista: Natalino Costa
Editór : Zezito Silva
