Governu presiza prioriza estrada urbana Maliana
MALIANA, 22 agostu 2023 (TATOLI) – Xefe suku no administradór postu sira husu IX Governu Konstitusionál, atu tau planu prioridade hodi implementa projetu estrada urbana Maliana pakote II.
Xefe suku Odomau, postu administrativu Maliana, Cirilio Moniz Cirio-Bere, haktuir, projetu refere lansa ona iha fulan-maiu tinan ne’e maibé besik ona fulan haat mós seidauk hahú ninia servisu fíziku.
Núne’e Autoridade lokál ezije ba Governu atu kontinua asume responsabilidade ne’ebé VIII Governu husik hela, tanba estrada Maliana ne’e povu hein kleur ona.
Notísia relevante: IX Governu presiza prioriza estrada urbana Maliana ba Cailaco
“Ha’u hanesan representante povu nível suku, nafatin rekomenda ba governu foun atubele halo kontinuasaun hodi implementa programa ne’ebé mak governu anteriór halo ona lansamentu, tanba komunidade nia ezijénsia mak asesu ba estrada, bee-moos no elétrika,” nia informa ba jornalista sira, iha Maliana, tersa ne’e.
Nia parte mós sei fó apoia másimu ba projetu refere bainhira governu iha ona planu atu implementa hodi lori dezenvolvimentu ba povu iha kapitál Maliana.
“Ita simu lamentasaun hosi ita-nia komunidade sira, maibé ita sempre enkoraja ita-nia komunidade sira atu hein, tanba ita tenke kompriende estafeta lideransa ukun hosi governu ida ba ida-ne’e presiza tempu,” nia katak.
Administradór postu administrativu Maliana, Tomás Laco-Loe, husu Ministériu Obra Públika aselera projetu refere, tanba durante tinan 20-resin ona povu preokupa kondisaun estrada iha kapitál Maliana.
“Governu ida-ne’ebé mak ukun, programa ida-ne’ebé halo ona lansamentu tenke ser halo kontinuasaun atu povu bele sente dezenvolvimentu, tanba estrada ne’e la’ós halo ba ema individu, maibé halo ba munisípiu Bobonaro no ba ema Timor Tomak,” nia katak.
“Horibainhira projetu na’in mai ona, haree estrada, konsege haree ona uma sira-ne’ebé ke afetadu, maibé to’o ohin loron obra refere seidauk komesa,” nia dehan.
Estrada modelu pista rua ka dua jalur ne’e ho distánsia kilómetru 4,91 no luan metru 23 no obra ne’e responsável hosi empreza PT Hutama Karya ho millaun $21-resin ($21,228,762.00) ho durasaun kontratu tinan ida fulan-neen.
Notísia relevante: Autoridade munisipál koordena MOP prioritiza estrada Maliana-Bobonaro no Lolotoe
Jornalista: Sérgio da Cruz
Editór: Evaristo Soares Martins
