MI no Komandu PNTL sei análize molok rekruta membru foun PNTL

DILI, 22 agostu 2023 (TATOLI) – Ministru Interiór (MI), Francisco Guterres, dehan tinan oin iha duni rekrutamentu ba membru Polísia Nasionál Timor-Leste (PNTL) foun maibé MI no Komandu Jerál PNTL sei halo análize kle’an molok halo rekrutamentu.
Nia dehan, rekrutamentu ne’e importante maibé tenke halo análize kle’an ho objetivu atu hatene servisu membru PNTL nian iha terenu tanba tuir dadus ne’ebé mak iha katak membru PNTL halo servisu iha terenu ba ema nain-500
“Hanesan ha’u dehan katak sei iha rekrutamentu maibé ha’u seidauk bele temi númeru efetivu hira mak ita atu rekruta tanba ne’e ami sei hamutuk ho Komandu hodi halo análize”, Francisco Guterres hateten ba jornalista sira iha Parlamentu Nasionál, tersa, ohin.
“Tanba ita haree agora daudaun ita-nia polísia ida atende halo kontrolu ba komunidade hamutuk nain-500, tuir lolos labele, tenke hatún polisia ida atende ema 120, tanba ne’e ita sei haree ida ne’e”, nia afirma.
Kona-ba kolokasaun efetivu PNTL ba fronteira, Governante ne’e hateten, Ministériu Interiór haree ona situasaun sira ne’e atu koloka tán efetivu sira balun ba tán iha fronteira.
“Ita sei haree hotu ida ne’e, tanba ne’e ita presiza análize kle’an molok ita koloka efetivu sira ne’e. Buat sira ne’e iha ona ita-nia planu ba tinan oin”, nia konklui.
Jornalista: Natalino Costa
Editór : Zezito Silva

