Ministru Nélio husu juventude rezolve problema entre fuan ho fuan
DILI, 22 agostu 2023 (TATOLI) – Ministru Juventude Desportu Arte no Kultura (MJDAK) Nélio Isaac Sarmento husu ba Juventude hotu atu iha problema karik tenke rezolve entre fuan ba fuan atu labele mosu konflitu tanba nasaun ne’e sakrifika ona ruin ho ran.
“Husu ba juventude-sira atu rezolve problema ho ulun malirin katak iha problema tenke rezolve hosi fuan ba fuan, labele uza kroat hodi hamate malu, joven mak futuru nasaun nian, Governu husu imi atu hapara ona violénsia kria mak pás iha ita-nia rain ida ne’ebé ita hotu hadomi”, ministru dehan ba Agência TATOLI iha Parlamentu Nasionál, ohin.
Nia dehan, bainhira problema mosu la rezolve ho didi’ak mak sei hamosu tan problema seluk ne’ebé ema hotu la hakarak.
“Joven sira hotu tenke hatur iha neon ona katak iha problema hapara tiha violénsia ne’e uza de’it kakutak ho ibun atu ko’alia”, nia husu.
rekorda fali katak problema ne’ebé akontese, hahú iha 18 agostu semana kotuk bainhira Grupu Arte Marsiál Persaudaraan Setia Hati Terate (PSHT) halo graduasaun ba membru foun sira iha Tibar Munisípiu Liquiça tuir dalan iha área Comoro hetan provokasaun hosi grupu arte rituál balun to’o estraga komunidade sira-nia uma no seluk tan.
Hosi akontesimentu ne’e mak da’et to’o ohin loron kada bairo sempre mosu konflitu entre joven sira hosi organizasaun ne’ebé la hanesan.
Maske iha konflitu hirak ne’e, Polísia Nasionál Timor-Leste (PNTL) halo kedan atuasaun no konsege detein joven balun ne’ebé deskonfia envolve direta iha akontesimentu sira iha Dili laran hodi prosesa tuir lei ne’ebé vigora ona iha nasaun ida ne’e.
Tanba ne’e, ministru ne’e husu ba lider Arte Marsiál hotu atu hakbesik ba membru sira hodi ko’alia no halo identifikasaun problema nia hun hosi saida.
“Lider Arte Marsiál sira mak tenke besik ona ba nia membru sira atu ko’alia, problema ne’e mai los hosi ne’ebé atu bele buka solusaun, husu sira la’o oituan ba fatin konflitu sira atu identifika hanoin, ita sei hetan solusaun”, nia hakotu.
Jornalista: Hortencio Sanchez
Editór : Zezito Silva
