Tinan oin aposta manutensaun ba mákina produsaun BI avaria iha munisípiu neen

DILI, 23 agustu 2023 (TATOLI) – Ministru Justisa (MJ) Amândio de Sá Benevides, dehan mákina produsaun ba Billete Identidade (BI) ne’ebé avaria iha munisipiu neen, MJ sei toma nota no sei rezolve iha tinan oin.
Munisípiu sira ne’ebé ho ninia mákina produsaun BI avaria mak munisípiu Bobonaro, Ainaro, Covalima, Baucau, Ermera no Manatutu.
“Ita sei tau iha planu asaun anuál tinan oin, atu nune’e ita bele prevé iha Orsamentu Jerál Estadu (OJE) 2024. Atu nune’e ita bele rezolve kestaun sira ne’e, nune’e bele fó atendimentu di’ak ba ita nian komunidade sira ne’ebé trata BI”, Benevides hateten ba TATOLI iha Parlamentu Nasionál, kuarta, ohin.
Governante ne’e hateten, MJ prioriza ba manutensaun mákina produsaun BI, tanba ida ne’e nudar nesesidade públiku ne’ebé fundamentu tebes.
“BI ne’e kestaun atendimentu públiku, ita presiza tau konsiderasaun”, nia adianta.
Iha biban ne’e, Benvides dehan ba atendimentu BI iha munisípiu Dili ne’e la’o ladún di’ak tanba fallansu tékniku.
Tanba, tékniku eletrisidade sira ne’ebé mak halo manutensaun ba eletrisidade iha Igreja Katedrál nian oin, entaun tesi sala tiha fiu internet hosi operadór telekomunikasaun ne’ebé fornese internet ba Diresaun Jerál Servisu Rejistu Notariadu, entaun mosu problema iha atendimentu.
“Maibé agora daudaun ne’e tékniku sira halo ona manuetensaun no atendimentu BI iha munisípiu Díli no Diresaun Jerál Notariadau la’o normál fila fali ona”, nia konklui.
Jornalista: Natalino Costa
Editór : Zezito Silva

