Empreza hosi Indonézia hakarak investe iha TL
DILI, 24 agostu 2023 (TATOLI) – Reprezentante hosi Empreza Paragon Pasífika Indonézia hasoru malu ho Prezidente Repúblika (PR) José Ramos Horta, hodi ko’alia kona-ba investimentu iha área plantasaun agríkula no floresta iha Timor-Leste.
Empreza Paragon hanesan kompaña Joint Venture ne’ebé konsiste hosi nasaun sira seluk hanesan Indonesia, Singapura, Xina, Malázia.
‘’Ami orgullu hasoru malu ho Presidente Timor-Leste, José Ramos Horta bele simu hodi ko’alia saida mak ami simu ohin loron kona-ba investimentu iha ami-nia área plantasaun, agrikultura no floresta, ami hosi Paragon Pasífika, hakarak halo negósiu iha área plantasaun”, Reprezentante Empreza Paragon Pasífika, Yudianto Tri, ba jornalista-sira iha Palásiu Prezdensiál, Bairo Pite, ohin.
Iha diskusaun ne’e ko’alia mós kona-ba preparasaun merkadu sira hanesan, sorgum, masimidar, aifarina no merkadoria indústria hands, sei presiza rai mínimu etare 50.000 iha Timor-Leste hodi halo investimentu.
‘’Ita servisu hamutuk ho CAS (China Agricultor Academy of Saing), hodi hetan bibit ne’ebé mak di’ak hosi merkadu ne’e, iha buat seluk ne’ebé mak ami sei halo plantasaun ho metodu modernu no kolleta depois prodúz ho metodu ne’ebé mak avansadu no modernu no ita mós la’os de’it kuda maibé prepara prosesu produsaun tamba sorgum ita bele halo tepun sorgum foos sorgum no ita bele hetan hosi tebu no mós hetan hosi masin midar ho aifarina no la lakon mós ho merkadoria hanesan bioetanol no biomethanol”, nia dehan.
Empreza internasionál prontu investe iha indústria floresta hodi explora rai ne’ebé mak abandona, bele fó benefísiu ba plantasaun ne’ebé produtivu no fó benefísiu iha ekonomia Timor-Leste iha futuru.
“Iha orsamentu ne’ebé mak kalkula ona ita presiza etare 50000 no ita kalkula Rp50.000 no bele mós liuhosi 50.000 talvez bele iha Lospalos no mós bele iha fatin seluk ne’ebé mak bele to miliaun etare entaun ita bele halo kalkulasaun ba investimentu ne’e”, nia relata.
Nia hatutan, bainhita Estadu Timor-Leste fó lisensa ba sira loke fábrika no investe iha área agrikultura nian mak sei loke kampu traballu ba timoroan liu rihun resin.
Tanba ne’e, PR Horta konkorda ho planu ne’ebé mak empreza internasionál hosi Indonézia ne’ebé hakarak investe iha Timor-Leste.
Tuir PR Horta, bainhira kompaña internasionál ne’e investe iha Timor-Leste mak sei fó benefísiu di’ak ba nasaun nia futuru.
Jornalista: Hortencio Sanchez
Editór : Zezito Silva
