TL partisipa enkontru ministeriál ASEAN ba dala-17
DILI, 24 agostu 2023 (TATOLI) – Governu Timor-Leste liuhosi Sekretáriu Estadu Protesaun Sivil, Domingos Mariano Reis, akompaña hosi Xefe Departementu Investigasaun Kriminál Nasionál (DIKN), Superintendente Polísia, João dos Reis Belo, Segundu Komandante Unidade Patrollamentu Fronteira (UPF), Superintendente Asistente Polísia Carlos Monis Maia no Diretora Jerál Servisu Migrasaun, Inspetora Xefe Polísia, Adelaide da Rosa, partisipa sorumutu ministeriál ASEAN kona-ba Krime Transnasionál (AMMTC-sigla ingles) ba dala-17, ne’ebé hala’o iha Labuan Bajo, Indonézia, durante loron haat, hahú 20-23 agostu.
“Atividade ne’e hanesan enkontru nivél ministeriál ida-ne’ebé espesifikamente diskute asuntu krime transnasionál iha ASEAN no sorumutu ne’e ofisialmente loke husi Prezidente Indonézia Joko Widodo via online”, tenik iha komunikadu ne’ebé Agência TATOLI asesu hosi media Ministériu Interriór (MI), kinta kalan.
Durante sesaun plenária, delegadu sira diskute asuntu krítiku lubuk ida kona-ba krime transnasionál no esforsu komún atu kombate krime transnasionál iha rejiaun ne’e.
Iha okaziaun ne’e, ko’alia kona-ba asuntu prioridade 10 ne’ebé iha relasaun ba krime transnasionál ne’ebé sai preokupasaun komún iha rejiaun ne’e.
Asuntu prioridade 10 kona-ba krime transnasionál ne’ebé diskute ona iha sorumutu internasionál mak krime terrorizmu, krime siber, kontra bandu kilat, komérsiu ilegál ba animál fuik no timber, tráfiku droga, fase osan, krime ekonómiku internasionál, pirasia tasi, kontrabandu ema no tráfiku umanu.
Partisipa iha sorumutu sira-ne’e maka lider sira hosi Estadu-membru ASEAN hotuhotu, Parseiru Diálogu ka sira-nia reprezentante sira, Timor-Leste nu’udar observador no Vise-Sekretáriu-Jerál ASEAN ba Komunidade Polítika Seguransa ASEAN nian.
Jornalista: Hortencio Sanchez
Editór : Zezito Silva
