Cottonii Group Lda exporta budu-tasi tonelada 50 ba Indonézia
DILI, 25 agostu 2023 (TATOLI)—Governu liuhosi Ministériu Agrikuktura, Pekuária, Peska no Floresta, sesta ne’e, halo lansamentu ba atividade exportasaun budu-tasi hamutuk tonelada 50 ba Indonézia.
“Governu durante ne’e serbisu hamutuk ho grupu sira hodi apoia materiál hodi hasa’e produsaun, ikus mai hatudu duni rezultadu hodi halo exportasaun ba nasaun sira ne’ebé presiza,” Diretór Nasionál Agrikultura, Alberto Viegas Soares, hateten iha ámbitu lansamentu exportasaun budu-tasi, iha Portu Tibar.
Budu tasi ne’e prodús hosi grupu hamutuk 300 iha munisípiu Ataúro ho envolvimentu empreza Cottonii Group Lda nu’udar empreza exportadór.
Fatin ne’ebé poténsia ba budu tasi barak liu iha munisípiu Ataúro, Dili lokaliza iha Metinaro, Liquiçá no Manatuto.
Notísia relevante : Governu fó formasaun prátika kuda budu tasi ba komuniade Metinaro
Tuir Alberto Viegas, budu-tasi hanesan produtu ne’ebé fasil atu haki’ak la persiza osan boot, no ninia durasaun ne’e loron 40 de’it bele kolleta ona.
“Grupu hamutuk 300 mak halo produsaun ba budu-tasi. Grupu sira ne’ebé prodús de’it depois serbisu hamutuk ho Cottonii Group Lda mak exporta bá rai-li’ur. Daudaun atu exporta ba Indonézia hamutuk tonelada 50, konta hamutuk ho antes ne’e totál tonelada 176, no planu exportasaun depende ba produsaun,” nia esplika.
Governu planeia ona atu identifika tan fatin sira ne’ebé poténsia ba budu-tasi no grupu sira ne’ebé halo produsaun maibé laiha asesu ba exportasaun hodi apoia materiál, nuneme bainhira halo exportasaun ninia kuantidade bele aumenta.
Bazeia ba dadus hosi ministériu hatudu katak, halo ona exportasaun budu-tasi ba rai-li’ur hanesan Koreia Súl, Indonezia no Xina, barak liu ba Koreia Sul hamutuk tonelada 490 totál osan rihun $600, iha tinan 2021-2022. Aleinde ne’e, halo ona exportasaun ba Koreia Súl hamutuk tonelada 40 iha janeiru to’o agostu 2023.
Iha biban hanesan, Prezidente empreza, Salomão Cabral, relata, hahú produsaun budu-tasi iha Ataúro iha tinan 2008. Momentu ne’ebá grupu sira hetan apoia hosi Governu hanesan materiál no hosi parseiru dezenvolvimentu balun.
“Ami organiza grupu de’it, entaun ami hanesan hasai lisensa ida tuir ninia regra hodi nune’e trata dokumentu sira hodi halo Exportasaun, ne’ebé ninia benefísiu ne’e ba grupu sira ne’ebé prodús budu tasi,” nia dehan.
Budu-tasi ne’ebé exporta ba Indonézia hamutuk tonelada 50 kalkula ba osan hamutuk rihun $35 kada kilograma $1,30.
Jornalista : Antónia Gusmão
Editora : Julia Chatarina
