IKS-PTL prosede formasaun ba membru hamutuk 100-resin
DILI, 25 agostu 2023 (TATOLI) – Organizasaun Arte Marsial (OAM) IKS-PTL realiza formasaun ba membru hamutuk 100-resin iha salaun Komisaun Nasionál Eleisaun (CNE-sigla portugés).
Objetivu hosi formasaun ne’e atu fó morál ba membru sira liuhosi meiu oioin atu muda mentalidade membru sira nian hodi redúz konflitu iha nasaun ne’e.
“Ida ne’e hanesan programa kontinuasaun hosi 2022 nian bainhira Arte Marsiál sira hetan taka, entaun Governu loke fali, ami hanoin atu fó formasaun ba sira, formasaun ida ne’e hanesan meiu edukasaun ida hodi muda membru sira-nia hahalok atu labele kria konflitu”, Prezidente IKS-PTL Silvestre Sufa dehan ba jornalista-sira iha salaun CNE, sesta ne’e.
Formasaun ne’e ho materia importante ne’ebé sei fó ba membru sira mak nasionalizmu no patriotizmu, edukasaun no sidadania, esperituál, jestaun organizasaun, jestaun lideransa no etika moral.
“Ema sira ne’ebé mak atu fó formasaun ne’e iha parte espirituál nian ita konvida amu lulik sira, nasionalizmu no patriotizmu ita konvida hosi veteranu sira atu mai partilla istória Timor nian ba joven sira atu hatene katak nasaun ne’e hetan ukun aan la’os fasil maibé liuhosi sakrifísiu ho nune’e labele hamosu konflitu, parte balun ami konvida hosi sosiedade sivil no akademista balun”, Silvestre dehan.
Formasaun durante loron tolu, formandu sira mai hosi munisípiu no kada munsípiu ema na’in-lima.
Orsamentu ba atividade ne’e hamutuk $1000-resin no osan ne’e mai hosi fundu ne’ebé atribui hosi Komisaun Reguladora Arte Marsiál (KRAM) ne’ebé iha fulan hirak ba kotuk transfere ona 40% ho totól rihun $10-resin hodi aloka ba item rua hanesan formasaun no kria kompetisaun.
Ho nune’e, iha fulan outubru IKS-PTL sei realiza kampionatu nasionál iha Dili ne’ebé sei envolve membru sira hotu iha teritóriu nasionál.
Orsamentu ba kampionatu nasionál hamutuk rihun $17-resin sei aloka ba prémiu ba manán na’in sira no preparasaun ba atividade nian no orsamentu ne’e apoiu hosi fundu KRAM nian ba Arte Marsiál.
Jornalista: Hortencio Sanchez
Editór : Zezito Silva
