Atleta Imbrolia husu Governu prioriza kondisaun másima
DILI, 28 agostu 2023 (TATOLI) – Atleta nasionál Federasaun Taekwondo Timor-Leste (FKTL) Imbrolia Amorin husu ba Governu atu tau prioridade ba atividade desportu hotu tanba iha esperiénsia antes dala barak modalidade hosi Timor-Leste kompete iha jogu internasionál ladún hatudu prestasaun di’ak, tanba ne’e presiza prepara kondisaun ba atleta sira ho másima.
“Dalabarak ita sempre lakon iha jogu internasionál sira, ita haree ema iha nasaun seluk ne’e sira iha fasilidade treinamentu kompletu no sira-nia kondisaun sira-nia Governu prepara ho di’ak, ha’u fó ezemplu ita-nia kompetisaun besik hala’o iha fulan lima neen ita foin prepara maibé ema nasaun seluk ne’e prepara tinan tomak ho kondisaun ne’ebé másima, entaun ema iha prestasaun ne’ebé di’ak”, Imbrolia dehan ba Agência TATOLI iha Farol Dili, segunda ne’e.
Imbrolia husu ba Governu ne’ebé lidera hosi Prieiru-Ministru Kay Rala Xanana Gusmão, atu tau importánsia ba desportu tanba atividade desportu mak lori nasaun ba mundu liuhosi jogu internasionál.
“Ita nia atleta barak mak iha prestasaun ne’ebé di’ak, Governu tenke fó subsídiu ruma ba sira atu fasilita sira-nia treinamentu, ha’u ko’alia la’os ba Taekwondo de’it maibé ba modalidade hotu atu bele fasilita sira atu selu transporte no seluk tan tanba maioria atleta mesak estudante de’it”, nia dehan.
Imbrolia Amorin hanesan atleta Taekwondo ida ne’ebé sai terseiru lugar iha SAE Games 2019 ne’ebé hala’o iha nasaun Filipina hodi hamorin Timor-Leste nia naran ho medalla osan metan ida.
Iha tinan 2022 iha Kamboja Imbrolia mantein iha nia títulu hodi oferese nafatin medalla osan metan ida ba Timor-Leste iha kompetisaun SEA Games.
Jornalista: Hortencio Sanchez
Editór : Zezito Silva
