TL-Brazil aborda futura kooperasaun iha múltipla setór
DILI, 28 agostu 2023 (TATOLI) – Ministru Negósiu Estranjeiru (MNEK), Bendito dos Santos Freitas, iha São Tome e Principe, reune ho Embaixadór Brazil Rui Carlos Pereira, Diretór Agência Brasileira de Cooperação (ABC), ne’ebé akompaña husi Sekretáriu África no Oriente Médio husi Repúblika Federal Brazil, Carlos Duarte, hodi aborda kestaun sira kona-ba natureza koperasaun bilaterál, énfaze liu iha setór saúde, edukasaun, kooperativa, formasaun ba rekursu umanu, diplomasia, rezolusaun konflitu no prinsípiu negosiasaun.
MNEK espresa apresiasaun ba asisténsia hosi Governu Brazil ba Timor-Leste, durante períodu difísil sira iha luta, nune’e mós ho apoiu inkondisionál ba Timor-Leste nia Rekonstrusaun Estadu, reprezenta espesialmente husi Doutór Sergio Vieira de Melo nu’udar Xefe UNTAET nian, figura importante ida mós husi Brazil ne’ebé oferese nia vida, tanba defende umanidade.
“Rekoñesimentu aas ba povu Timor-Leste, to’o halo sai Prémiu Anuál ba Direitu Umanu Timor-Leste nian, ne’ebé hanaran Prémiu Sergio Vieira de Melo, ne’ebé organiza diretamente husi Prezidénsia Repúblika Timor-Leste”, tenik Ministru Bendito iha komunikadu ne’ebé Agência TATOLI asesu, ohin.
Iha fatin hanesan, Embaxadór Brazil Rui Carlos Pereira, hateten Governu Brazilleiru mantein apoiu Timor-Leste iha prosesu dezenvolvimentu iha área oioin ne’ebé Timor-Leste presiza.
“Brazil demonstra firmeza no prontidaun hodi oferese apoiu hosi sira-nia Governu ba Timor-Leste no aprezenta mós planu ida atu vizita Timor-Leste iha inísiu fulan Novembru oin mai no diskute ho líder timoroan sira kona-ba importánsia hosi ajenda kooperasaun bilaterál entre nasaun rua ne’e”, Rui Carlos dehan.
Embaixador Rui Carlos Pereira hosi ABC hatudu atensaun makas iha diskusaun ne’e ho MNEK Timor-Leste no promete sei vizita nasaun ne’e iha tempu besik.
Jornalista: Hortencio Sanchez
Editór : Zezito Silva
