TL-São Tome e Principe aborda futura kooperasaun diplomátika
DILI, 29 agostu 2023 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas, enkontru kortezia ho nia omólogu Ministru Negósiu Estranjeiru (MNE) São Tomé e Príncipe, Garety Guadalupe, hodi aborda kona-ba futura kooperasaun entre nasaun rua iha área formasaun profisonsál, diplomasia no seluk tan.
Enkontru ne’ebé hala’o iha edifísiu MNE São Tomé e Príncipe ne’e, akompaña hosi Xefe Misaun Permanente Junta CPLP, Embaixadora Marina Ribeiro Alkatiri.
Bendito Freitas hateten, enkontru ne’e importante tebes, tanba fortalese liután kooperasaun entre nasaun rua nian iha área diplomasia.
“Ami ko’alia kona-ba posibilidade kooperasaun iha área formasaun profisionál, formasaun iha área diplomasia, relasaun internasionál no dala ruma mós asisténsia téknika, ne’ebé bele apoiu ministériu iha Timor no área balun liu-liu São Tomé hakarak tebes apoia Timor-Leste”, hatete Bendito.
Governante ne’e hatutan, bá oin, ekipa téknika hosi nasaun rua ne’e, presiza tur hamutuk atu diskute programa prioridade ne’ebé atu hahú, bazeia mós bá tema hosi Konferénsia CPLP kona-ba “Juventude Sustentabilidade”.
“Ne’e ita hotu nia esperansa, agora ita tenke servisu hamutuk, ekipa rua atu halo diskusaun klean atu define materia ida ne’ebé mak atu hahú no mós iha tema konferénsia juventude sustentabilidade área ne’ebé ita hanoin nesesariamente iha kooperasaun ne’e, eintermus poténsia ne’ebé ita iha atu fortalese interkámbiu, troka hanoin no koñesimentu bá ita-nia joven sira”, Ministru Bendito hakotu.
Jornalista: Hortencio Sanchez
Editór : Zezito Silva
