MJDAK kafé hamutuk ho jornalista destakadu
DILI, 31 agostu 2023 (TATOLI) – Ministériu Juventude Desportu Arte no Kultura (MJDAK) realiza programa kafé hamutuk ho jornalista destakdu sira iha fulan tolu dala ida atu fahe opiniaun ba malu atu bele koordena malu servisu entre jornalista ho ministériu.
“Programa ida ne’e ita la’os foin mak halo maibé iha kedan VIII Governu nia tempu ita halo ona, nia objetivu prinsipál mak dezenvolve komunikasaun di’ak entre MJDAK no jornalista sira”, Xefe Unidade Komunikasaun no Relasaun Públika (UKRP) MJDAK Beldemira de Araujo dehan ba Agência TATOLI iha Lecidere, ohin.
Nia hatutan, hasoru malu ne’e hanesan meiu ida mós MJDAK bele esplika planu no programa importante ne’ebé sei halo, hosi ne’e jornalista sira mós bele hato’o krítika ba kestaun ruma ne’ebé MJDAK halo la los bele hadia hamutuk.
“Hamutuk ida ne’e atu ita fahe hanoin ba malu fulan tolu dala ida, karik durante ne’e mak MJDAK halo buat ruma la-los jornalista sira bele fó hanoin no krítika atu ita bele hadia hamutuk no fó hanoin ba Governu atu kontinua halo servisu ne’ebé ho sériu”, nia relata.
Iha okaziaun ne’e, jornalista Arminda Carvalho hosi Radiu Telivizaun Timor-Leste, Empreza Públika (RTTL,EP) husu ba UKRP atu fasilita servisu jornalista nian ho di’ak atu bele halo kobertura ho másima ba atividade MJDAK nian.
“Dala barak ami susar iha komunikasaun, halo ami falla atu halo kobertura iha ministériu ida ne’e, ba oin presiza hadia atu nune’e ita bele iha komunikasaun servisu ba malu ho di’ak no ami mós bele kobre ba ita-bo’ot sira-nia atividade, liuliu munisípiu bele lori mós ho ami tanba ami-nia kolega sira iha munisípiu iha maibé sira kobre área luan entaun sira la biban atu kobre saida mak MJDAK halo iha munisípiu”, nia sujere.
Nia dehan, durante ne’e jornalista presiza atu halo kobertura ba asuntu importante balun ne’ebé presiza ministru atu ko’alia maibé birokrasia naruk tebes to’o la konsege entrevista tanba ne’eho ba oin ministériu tenke hadia servisu sira ne’e atu fó biban ba jornalista se de’it bele hasoru ministru ho fasil atu entrevista.
Jornalista: Hortencio Sanchez
Editór : Zezito Silva
